Гюлягьмад Маллялиев
26-пи сентябри Мягьячгъалайиъ гюзчивал гъабхру ва гьисаб апIру органарин кIулиъ айидарихъди вуйи вари Урусатдин совещание гъабхьну. Думу Дагъустандин Счетный палата тешкил дапIну 30 йис хьпахъди аьлакьалу дапIнайиб вуйи. Дагъустандин глава Сергей Меликовдин ва федеральный аудитор Наталья Труновайин иштираквал ади кIули гъубшу совещаниейиъ уьлкейин 20-тIан зиина регионариан дуфнайи пишекрари туризмйин циркил артмиш апIбаз кюмек вуди гьюкуматдин терефнаан кьабул дапIнайи уьлчмйирин файдалувалин, цирклиз деетнайи дакьатар кьяняаьтлуди харж апIувалин ва жара месэлйир гьял гъапIнийи.
Серенжемдин аьхириъ Дагъустандин Счетный палатайин саб жерге гъуллугъчйириз гьюкуматдин наградйирра тувнийи. Лишанлу гъапIдарин цIарнаъ ихь ватанагьли, РД-йин Счетный палатайин аудитор Бейдуллагь Мирзоевра айи. Дугъаз Сергей Меликовди «Жюрэтлу зегьметназ лигну» орден тувну.
Дупну ккундуки, му Бейдуллагь Мирзоевдин, пулин дакьатарин зиин гюзчивал гъабхру ведомствойиъ лихури, гъазанмиш гъапIу сабпи награда дар. 2021-пи йисан думу «Дагъустан Республикайин яшайиндинна экономикайин артмиш’валик киву пайназ лигну» медалииндира лишанлу гъапIнийи.
Учу газатдин терефнан Бейдуллагь Гьяживердиевич заан хъуркьувалихъди тебрик гъапIу вахтна, дугъу, чухсагъул дупну, чан ляхникан сакьюдар гафар гъапнийи.
«Багъри райондихъди аьлакьа дудрубгри, узу 2019-пи йисан 1-пи январихъанмина РД-йин Счеитный палатайиъ лихураза – сифте инспекцияйин начальникди, хъа 2021-пи йисанланмина аудиторди. Гьамусяаьт жигьилган гъадабгъу пишейихъ хъаза, ва думу кIваантIан кьабулдира вузуз.
Счетный палата – му пулин дакьатарин зиин гюзчивал гъабхру асиллу дару орган ву, дидин вазифа – республикайин мал-мутму ва бюджетдин дакьатар файдалуди ва ачухъди идара апIбан зиин гюзчивал гъабхуб ву. Учу ич ляхниъ ихтиярарин къайдйир тяйин апIру (НПА) актарин экспертиза ва республикайин бюджет тамам апIбан аудит гъабхуруча.
Гьелбетда, фунуб ляхниъра хъуркьувал инсанарилан асиллу ву. Инсанар, ужудар пишекрар гьарсаб тешкилатдин асас девлет ву. Йиз фикриан, гьарсаб ляхнин натижара пишейиз вафалувалиан, пишекарвалиан асиллу ву. Эгер ув’ина ихтибар дапIнайи вазифйир уву гьякьлуди ва намуслуди кIулиз адагъуруш, уву, шаксуз, хъуркьувалихьна гъидива. Гьаму принцип узу йиз уьмрин усулди дибисназа ва думу гьар йигъандин ляхниъ ишлетмишра апIураза»,
– гъапнийи Бейдуллагь Мирзоевди.
