Гюльнара Мягьямедова
25-пи августди Дагъустандин Главайин вазифйир вахтназди тамам апIурайи Федор Щукин Урусатдин Федерацияйин транспортдин министрин заместитель Валентин Ивановдихъди гюрюшмиш гъахьну. Республикайиз дуфнайи вахтна федеральный министерствойин вакил гьюкуматдин сяргьятарилан сабуну терефналан тмуну терефназ инсанар деетру пунктарин ляхнихъди таниш гъахьну, Мягьячгъалайин гьюлин портназ ва «Уйташ» аэропортназ гъушну.

Гюрюшдин иштиракчйири чпин сюгьбатнаъ ихь региондин транспортдин артмиш’валин месэлйир за гъапIнийи, гьадму гьисабнаъди дурари Мягьячгъалайин гьюлин портназ машинар гъягъру рякъ ккивуб, гьюкуматдин сяргьятарихъ хъайи пунктарин ляхин айибтIан ужуб къайдайиз хуб, Мягьячгъалайин ва Каспийскдин арайиъ электричка деебтуб, региондиъ жямяаьтлугъ транспорт цIийи алапIуб ва жара месэлйирра гъитIирккнийи.

 
2020-2024-пи йисари Федеральный министерствойин кюмекниинди Дагъустандиз 92 автобус хътаънийи. Ццийин йисан 141 кьадарнаъди жямяаьтлугъ транспорт хътапIуб планламиш дапIна. 2026-2028-пи йисари Дагъустандиз 383 автобус хътауз субсидйир тувди. «Жямяаьтлугъ транспорт ва рукьан рякъюн саб шагьриан тмуну шагьриз гъябгъру транспорт цIийи алапIбиин ляхин апIурача», – гъапнийи Валентин Ивановди.

 
Региондин кIулиъ айири шулайи дигиш’валарин мяналувализ фикир тувнийи: «ВаритIан асасуб дагъустанлуйириз гъулайвалар яратмиш апIуб ву. Жямяаьтлугъ транспорт цIийи алапIуб чарасуз ву. Республикайин вари география гьисабназ гъадабгъган, агьалйирихьан транспортдин гьякьнаан аьрзйир гизаф а. Ухь’ан инсанар лазим вуйи инфраструктурайихъди тямин апIуз удукьури ккунду.

 
Республикайиъ гьюкмин кIулиз дуфнайи дестейи транспортдин месэла сабпи нубатнаъди гьял дапIну ккуниб гьисаб апIура. Вари кьувват айи мумкинвалар ишлетмиш апIбаз сарф апIидихьа. Хьуд йисандин арайиъ туризм 2,5 ражари за гъабхьну. Республикайиз гъюз ккунидарин кьадар артухъ шула. Гьаддиз табиаьтдин уткан йишвар айи гьарсаб муниципалитет артмиш апIидихьа», – гъапнийи Федор Щукинди.

Къайд апIуб лазим вуки, республикайиъ жямяаьтлугъ транспортдин аьгьвалат гъагъиб ву. Шагьрариъ маршрутдиинди гъягъюрайи автобусар гьаммишан инсанарихьди ацIну шулу. Хьадан мани вахтна жямяаьтлугъ транспортдиъди гъягъюб лап читин ву: яшлуйир, бицIидар хъайи дишагьлийир лап инжик духьну шулу. Гьамус сентябрин ваз кубкIра. ТятIилариз деетнайи баяр-шубар, студентар дарсариз гъягъюз хъюгъди. Думуган гьапIру?! Эгер Мягьячгъала-Дербент маршрутдиинди гъябгъру электричкайикан улхуруш, хьадан вахтна думура кьикьнихъди абцIну шулу: дусру йишвар алацIнайивализ дилигну, дийигъну гъягъюз гьязур вуйидарин кьадарра цIиб дар. Думу месэла чарасуз гьял дапIну ккуниб ву.