Наргиз Гюлечова
Сачдихъанмина Урусатдиъ цIийиди диврайи хулариъ ихь уьлкейиъ гьясил гъапIу ва вари мялуматар тувру счетчикар кивбан жягьтлувализ фикир тувра. Думу счетчикар гъубгу газрахъан, мичIли ва мани штарихъан мялуматар туврудар ву. Гьамусдихъантина хуларик чарасуз вуди ихь уьлкейин счетчикар кивбан ляхнар яваш-явашди давам хьиди. Дурар хусуси хуларикси, гизаф мертебайиндарикра кивди. Хъа 2027-пи йисаз квартирйирин айитIра кивну ккудубкIиди.

Гизаф мертебйирин хуларин подъездарикк вая квартирйирин айитI зигьимлу счетчикар кивбан кьяляхъ фу дигиш шулуш гьерхри, узу Дагъустан Республикайин инсанар яшамиш шлу хуларин месэлйириз лигру гьюкуматдин кIулин инспектор Сергей Касьяновдихьна илтIикIунза.
Дугъу гъапиганси, ишлетмиш гъапIу газран ва штун кьадар гьисаб апIру хулариъ киврайи му жюрейин счетчикари, саб кIуруб, дишлади харжарин вари улупбар ва кьадар гьисаб дапIну, дидхъан гьякъи гъадабгъру йишваз хътаура. Хъа кьюб кIуруб, эгер фицибкIа хатIавал арайиз гъюраш, янаки наънанкIа газ вая шид ктипури, хатIавал арайиз гъюб мумкинвал аш, дидкан хулан эйсийизра, аварйирин диспетчеризра хабар дебккра.

«Ав, икибаштIан, думу ужуб ляхин ву. Йис гьелелиг ккебгънутIан амдар, хъа гъийин йигъаз республикайиъ газрахъди аьалакьалу вуди швнуб-саб бедбахтвалар арайиз дуфна. Эгер дицдар счетчикар хуларик кайиш, мукьан пашман дюшюшар хьидайи. Гьаддиз, аьгьвалат дигиш апIбан чарйир агури, хуларин эйсйир чпи чалашмиш духьну ккунду», – кIура С.Касьяновди.