Мялум вуйиганси, 1-пи июлиъ Президент Владимир Путиндин теклифниинди Урусатдин Конституцияйиъ саб жерге дигиш’валар тIаъбан гьякьнаан ватанагьлийири чпин разивал, даршсана аьксивал улупбан бадали, йишвариин сесер тувбан серенжемар кIули гъягъиди.

 

Улупнайи серенжемар йишвариин заан иштирак’валиинди гъахувал ТИК-ариз табшурмиш дапIна.

Хив райондин ТИК-дин председатель Исрафил Салигьовди къайд апIурайиганси, райондиъ му гьяракатар вари Урусатдиъ сесер тувбан гьякьнаан РФ-дин ЦИК-ди тасдикь дапIнайи саягъниинди гъахиди. Улупнайи йигъан агьалйири гвачIниндин миржибдиан хябяхъдин сяаьт миржибдиз сесер тувуб лазим ву. Дидланра савайи, коронавирус уьзрихьан жямяаьтлугъди хатIасузвал уьбхбан, гизаф агьалйир сатIиди уч хьпан дюшюшар хьуз гъидритбан бадали, ватандашариз гъябгъюрайи вазлин 25-дилан 30-ризкьан фунуб йигъан ккундуш чпин хушниинди сес тувуз мумкинвал тувра.

– Улупнайи вахтназ Хив райондиъ сесер тувру 35 участок гьязур дапIнача. Дурар, МО-йин главайин къарариз асас вуди, 10 йисаз тасдикь дапIнайидар вуйи. Улупнайи участокариъ, сес тувуз ихтиярар ади, гюзчивал гъабхру 101 касди ляхин апIиди. Гьарсаб участок сесер тувру ватандашарин бедендин температура ахтармиш апIру тепловизорихъди, тувбан ляхниз лазим вуйи тадарукарихъди тямин дапIна. Гьаму йигъари антисептикарихъдира тямин апIиди.

Конституцияйиъ дигиш’валар тIаъбан гьякьнаан сесер тувбаз Хив райондиз саки 14 агъзуртIан артухъ бюллетенар жара дапIна,

– гъапну И.Салиховди.