Аьхиримжи вахтна ихь дагълу юрднаъ яшамиш шулайидари, тарихдихьна гизаф хътакури, багъри культура, ухьуз абйирилан гъубзнайи ирс уьбхюз чалишмиш шули, жюрбежюр проектарин зиин ляхин гъабхура. Жигьиларин гъайгъу зигбан, дурари азад вахт чпин сагъламвализ зарар тутрувди гьапIбан бадали, ихь шагьрариъ, районариъ хайлин серенжемар кIули гъахура.

Жигьилар наркотикарин хъа асиллувалиъ адрахъбан бадали, профилактикайин ляхин фици гъабхураш аьгъю апIуз кIури, узу Дербент шагьрин администрацияйин культурайин управлениейин кIулин пишекар Изумруд Уружевайихъди ва Дербент райондин администрацияйин жигьиларин отделин начальникдин вазифйир кIули гъахурайи Кемран Исаевдихъди гюрюшмиш гъахьунза.

Изумруд Сялигьовнайи тасдикь гъапIганси, Дербент-диъ айи мектебариъ, ссузариъ ва вузариъ наркотикариз аькси ляхин жюрбежюр къайдйириинди гъабхура, жигьиларин отделин пишек-рари нарколог духтрихъди, къанунар уьрхру органарин пишекрарихъди гюрюшар тешкил апIура.

«Йисандин арайиъ кIули гъахуз планламиш дапIнайи профилактикайин серенжемариъ диндин вакилар, шагьрин АТК-йин пишекрар, психологар иштирак шула. Дурари баяр-шубариз наркотикари хру бедбахтваларикан ктибтура. «Учу сагъу уьмур ктабгъурача», «Дербент шагьри наркотикариз «ваъ» кIура» кIуру акцйириъ, митингариъ шагьрин мектебариъ ва образованиейин жара тешкилатариъ урхурайидар иштирак шула», – мялум гъапIну Изумруд Уружевайи.

Дугъу къайд гъапIганси, шагьриъ айи волонтёрарин дестейира жигьилариз ватанпервервалин тербия тувбаъ гизаф ляхин гъабхура, спортдин жюрбежюр талитар тешкил апIура, кьялан пишекарвалин ва заан образование тувру тешкилатариан вуйи командйир ДДЮТ-диъ гъябгъру КВН-диъ иштирак шула.

Кемран Исаевди къайд гъапIганси, райондин мектебариъ «Спорт терроризмдизна наркотикариз аьксиди» кIуру серенжемарра гизаф тешкил апIура, варитIан жанлуди Мамедгъала, Билижи посёлокарин ва Хазар гъулан мектебариъ. Терроризмдихъдина наркотикарихъди профилактикайин ляхин дугъу регьбервал туврайи отдели АТК-йин пишекрарихъди, диндин вакиларихъди, гъуларин участокарин инспекторарихъди сабхилди кIули гъабхура. Март, апрель, май вазариъ Ватандин Аьхю дявдин ветеранарихъди вуйи серенжемар тешкил апIури, ватанпервервалин тербияйиз фикир тувра.

«Гьамусяаьт жигьилар улихьдин вахтнаси къанунсуз рякъяриъ ахьри имдар. Дурари, чпин яшайишдикан фикрар апIури, пул гъазанмиш апIуз шлу йишвариз гъягъюра. Жигьиларихъди гьял апIуз даршлу месэлйир адар гъапишра, кIучIал шулдар. Участокарин инспекторар вари хизанарихъди таниш ву. Яшнакк ккудруркьу баяр-шубариз наан арагъи масу тувраш, дурари ахтармиш ва ариш-веришчйириз къадагъа апIура», – давам гъапIнийи дугъу.

Жигьил пишекар Кемран Исаевдин гафариинди, респуб-ликайиъ бикарвал цIиб гъабхьнийиш, жигьиларин уьмур ужуб терефназди дигиш хьибдийи. «Ляхин апIуз ккунириз думу бихъуру. Таксиствал апIуз ккунидариз гьар вахтна ляхин а. Хусуси тешкилатариъра жигьилариз 12-15 000 маважиб тувру ляхнар дихъура», – аьлава гъапIнийи дугъу.

Ав, жигьилар къанунсуз рякъяриъ адрахьбан бадали, районарин ва шагьрарин улихь-кIулихь хьайидари профилактикайин ляхин кIули гъабхура. Вушра, гъахурайи серенжемариъ иштирак даршулайидарин кьадарра аьхюб вуди гъубзра. Дурарин кIулиъ фицдар фикрар аш, шлиз аьгъя?