РФ-дин экономикайин арт-миш’валин министрин сарпи заместитель Михаил Бабич ва РД-йин Правительствойин председатель Артем Здунов ляхнин гъуллугъ ади Дербент шагьриз гъушну. Гьадушваъ дурар Дербентдин артмиш’валин асас проектарихъди таниш гъахьну. Мидкан «Табасарандин нурар» газатдиз РД-йин Правительствойин пресс-гъуллугънаан мялумат тувнийи.

 

 

Дербент шагьрин глава Хизри Абакаровди, Низами Гянжевийин ччвурнахъ хъайи парк бинайиан къайдайиз хурайиваликан ктибтури, дуфнайи хялар паркдин аьтрафариин ачмиш апIуз планламиш дапIнайи мультимедийный фонтандин проектдихъди таниш гъапIну. Къайд дапIну ккундуки, му парк Дербент шагьриъ варитIан аьхюб ву. Думу СтIал Сулеймандин ччвурнахъ хъайи паркдихьан кюгьне шагьрин кафари терефнан цалари жара апIура.

Пресс-гъуллугънаан туву мялуматариинди, паркдин аьтрафариин али кафари цаларин кюгьне ядиграрикан саб – 1853-пи йисан урус эскрари диву аквнан лишнариинди рякъ улупру гакIвлин чIвурд вуйи. 1866-пи йисан гьадушв’ин гъвандин чIвурд тикмиш гъапIну. Думу чIвурдра абццуз планламиш дапIна. Паркдиъ кюгьне архитектурайин тарихи ядиграр хъана а – «Къиямат-капы» урнар – «Гьякь-гьисаб гъадабгъру йигъандин урнар» ву.

Хялар Нарин-гъалайин кафари терефнан цалихъди гъябгъюрайи Мамедбеговдин кюче къайдайиз хурайи проектдихъдира таниш гъахьну. Проектдиинди му кючейиъ инсанар лицру йишвар мюгькамди ккабалгувал, туристариз Дагъустандин халкьдин художествойин сяняаьткарвалар улупру йишвар арццувал, гизафси чрушин айи йишвариъ ва гъалайин цал’ин жюрбежюр рангар тувру аквар китIувал улупна.

Низами Гянжевийин ччвурнахъ хъайи парк бинайиан мюгькам апIувал швнуб-саб этапдиъди кIули гъябгъюра – аьхю мультимедийный фонтан тикмиш апIувал ва паркдин аьтрафар къайдайиз хувал. Дупну ккундуки, Дербент шагьриъ тикмиш апIурайи мультимедийный фонтан Дагъустандиъ сабпиб ву.

Михаил Бабичди ва Артем Здуновди, Дербентдин артмиш’валин пректарин презентацияйиъ иштирак хьпан кьяляхъ, шагьрин аьтрафарин артмиш’валин месэлйириз бахш дапIнайи сатIи совещание гъубхну.

Сифте РФ-дин экономикайин артмиш’валин министрин сарпи заместителин ва РД-йин Правительствойин Председателин улихьна Дербентдиъ туризмдин циркил артмиш апIбан ва агьалйирин яшайиш мублагъ апIбан программйир адагъну.

Совещание ачмиш апIури, Михаил Бабичди уьлкейиъ мициб тарих ва мумкинвалар айи шагьрар цIибтIан адрувал къайд гъапIну.

«Дугъриданра, туризм артмиш апIбаан Дербент шагьур, Урусатдиъси, вари халкьарин арайиъра туризмдин асас йишвси улупуз шулу. Гьаз гъапиш, му шагьур кIулди вари дюн’яйин тарихдин гевгьер ву. Гъийин ихь совещание Дербент артмиш апIбаз фу лазим вуш, ихь сатIи вуйи кьувватариинди гьапIну ккундуш, гьаддиз бахш дапIнайиб ву. Ухьуз шагьур ккуни, дидиз чпин дакьатар ва мумкинвалар гьяйиф дарди жара апIурайи дустар ахьуз. Дурариан арайиан Урусатдин дилаварчи Сулейман Керимов, «Сбербанк» ПАО-йин кIулиъ айидар ва жара инвесторар улупуз шулу. Федералин, региондин ва муниципалин гьюкмин кIулиъ айидар вари, чпин кьувватар сатIи дапIну, Дербент Кавказдин ва вари Урусатдин туризм артмиш шулайи центриз илтIибкIуз гьязур ву», –

къайд гъапIну Михаил Бабичди.

Дугъу мялум гъапIганси, Дербентдин 2000 йис къайд апIбан кьяляхъ, натижйир йивури, Урусатдин Президентди Дербентдин инфраструктура артмиш апIбан серенжемарин сиягь тасдикь гъапIну. Гьамусяаьт гьадму сиягьдин дахилнаъди шагьриъ айи Самур-Дербент шид тувру гъанаварин гъурулуш рас апIура, кьалу штар ва чиркишнар гъягъру гъурулушар тикмиш апIура. Гьаму тикилишар Дагъ. Огни шагьриъра тикмиш апIбан месэла гьял апIуз адабгъна.