Урусатдин Федерацияйин мярифатнан министр Сергей Кравцов гьаму йигъари «Россия 1» телеканалин «Хабрар» программайиъ иштирак гъахьну ва вари уьлкейин ватандашариз цIийи урхбан йисан эвелиъ образованиейин цирклиъ гъахру гьяракатарин ва дигиш’валарин гьякьнаан планламиш дапIнайи серенжемарикан ктибтну.

 

Министри къайд гъапIганси, баяр-шубар, аьдат вуйиганси, 1-пи сентябриъ мектебариз гъягъиди ва аьгъювалар тувбан программа Роспотребнадзорин тIалабариз жаваб тувру къайдайиинди тешкил апIиди.

Сергей Кравцовди туву мялуматариинди, сентябрь ва октябрь вазариъ, вари Урусатдин мектебариъси, республикайин мектебариъра ахтармиш апIбан ляхнар кIули гъахиди. Думу серенжемари, мектебариъ урхурайидарин аьгъювалар гъадагъбаъ алахьурайи читин месэлйир ашкар апIбан кьяляхъ, мялимариз образованиейин цирклиъ кюмек тешкил апIуз мумкинвал тувди.

«Аьгъювалариз кьимат тувувал стандартариинди тасдикь дапIнайи федералин дережайин табшуругъариан гъабхиди. Кьиматар дивуз сифте гьялак хьидархьа. Сабпи нубатнаъди учу, образованиейин дережа ис дархьбан бадали, кьатI’иди гьарсаб педагогвалин вуздихъди, пишекарвалин дережа за апIру институтдихъди жа-жаради ляхин тешкил апIурача», – къайд гъапIну министри.

Дугъу гьацира, 1-пи сентябрилан башламиш дапIну, Урусатдин Федерацияйин Президентдин табшуругъниинди, мектебдиъ мялимариз маважибдиин класс кIули гъабхбахъан аьлава пул иливрувал кIваин гъапIнийи.

«Классдин идара апIувализ пул за гъапIну кIури, маважибдиин аьлава вуди иливнайи я региондин, ясана муниципалин пулин дакьатар кам дапIну ккундар», – къайд гъапIну Сергей Кравцовди.