Жямяаьтдин гъуллугънаъ хьувал лап метлеблу ва баркаллу ляхин ву – мидин гьякьнаан лукьман касарира гизаф дупна, жвуву жилиин гъибтру лишнин гъадри кайидарра дидин ужуди гъавриъ а. Агьалйирин гъуллугъар, метлебар гьуркIувал гъи гъулан советарин кIулиъ айидарин гьам вазифара, гьам буржира ву.
Жямяаьтлугъ игьтияжар гьуркIбан ляхин чав фици гъабхураш, Дербент райондин Мамедгъала поселокдин администрацияйин кIулиъ айи Исрапил Маллаевди (шиклиъ) ич хусуси мухбир Умгьанат Сулеймановайиз ктибтну. Дурарин арайиъ гъабхьи сюгьбатнан асас мяна айи пай исихъ туврача. Гьацира къайд апIуб лазим вуки, Исрапил Маллаевди Мамедгъала поселокдин администрацияйиз регьбервал туври 5 йис ву, ва гьаму вахтнан арайиъ дугъу хайлин ужудар ляхнар уьмриз кечирмиш гъапIну.
– Узу поселокдин администрацияйин главайин вазифйир, йиз улихьна мушваъ гъилихдарин нумуна ляхнар давам апIури, кIули гъахуз хъюгъюнза. Республикайиъ варидариз аьгъюганси, Мамедгъала поселокдин агьалйирин яшайишдин дережа за апIбак Социалист Зегьметнан Игит Нариман Аьлиевди аьхю пай кивну. Дугъу регьбервал туври гъахьи Ш.Аьлиевдин ччвурнахъ хъайи совхоз чан вахтна вари СССР-из машгьур гъабхьнийи. Гьамусяаьт думу мяишатдиз «Н.Аьлиевдин ччвурнахъ хъайи ЗАО» кIура ва баркаллу ляхнар давам апIурайир Нариман Аьлиевдин худул Мягьяч Атаев ву. Мягьяч Зейналовичди, аьхю абайин шилнаъди душну, чав регьбервал туврайи мяишатдин ляхин заан натижйир гъазанмиш апIруганси ккабалгбиин эллешмиш духьна. Дугъу администрацияйизра Мамедгъалайин агьалйириз ужудар шартIар яратмиш апIбаъ хайлин кюмекар апIура. Мяишатдин улихь мицир жавабдар кас хьайивал аьхю девлет ву.
Поселокдин гьякьнаан улхуруш, Мамедгъалайиъ 12150 кас дуланмиш шула. Асас фикир кючйириин асфальт улубзбиина жалб апIурача. Гъийин йигъаз М. Горькийдин, Н. Аьлиевдин, СтIал Сулеймандин, Комаровдин ччвурнахъ хъайи, Шоссейная ва ЦIийи Сулипа кючйириин асфальт улубзнача. Цци, ноябрь вазлиъ, 1000 метрсан рякъ’ин асфальт улубзуз гьязурлугар гъахурача. Хъа имбу кючйир, жвилли кIекIел алабхьну, гьязур дапIнача. Иншаллагь, гележегдиъ вари рякъяриин асфальт улубзидича.
Гъулан мяишатдин экономика артмиш апIбан ва табиаьт уьбхбан, хутIлариз шид туврайи гъанавар марцц апIуз тикилишар дивбан месэлйир гьял апIбазра асас фикир туврача. Гьаму ляхнариъра Мягьяч Атаев кюмекчи духьнайиз, чухсагъул чаз. Дугъан кюмекниинди поселокдиъ инсанар лицру паркра къайдайиз хурача. Дидланра савайи, вари кючйириъ йишвну аквар хьпан бадали, электролинйир, бурузар, трансформаторар дигиш апIурача. Гьацира бицIидарин багъар рас апIуз кюмекар туврача. Мектебаризра учхьан шлу кюмекар апIурача.
Аьхиримжи йисари, гъулан мяишатдин вари цирклариз фикир туври, Мягьяч Атаевди регьбервал туврайи агрофирмайи, мяишат улихьна гъабх-бан, бегьерлувал за апIбан бадали, агротехникайин вари серенжемар тамам апIура. Му агрофирмайиз мягьсулар урзру ужудар чюллер а. Хайлин жилин гектарар рабочйирихьна кирайиз тувна. Дурари бистнин мейвйир – памадур, иставут, бадамжан, арфани, келем – урзура ва гъадабгъу бегьер, ухьухь цIиб кьиматназтIан масу тувуз даршлуган, Урусатдин шагьрариз гъабхури шулу.
Ич гъулаъ яшамиш шулайи гьарсар кас ляхнихъди тямин ву. Жикъиди гъапиш, Мягьяч Атаевдихъди сабси ич жямяаьтдин гележегдикан фикрар апIури, мяишат улихьна гъабхбан, гъулан агьалйирин тIалабар тамам апIбан женгнаъ ача», – ктибтнийи Исрапил Маллаевди.
«Гьюрматлу урхурайидар, мялимар, абйир-бабар! Учву вари улубкьурайи аьгъюваларин, вари дюн’яйин ислягьвалин Йигъахъди, аьхирки, цIийи урхбан йисахъди кIваантIан тебрик апIури, учвуз урхбаъ, ляхниъ заан хъуркьувалар, жандин мюгькам сагъ’вал, ичв хусуси ва хизандин уьмриъ хушбахтвал ккун апIураза», – илтIикIнийи гъуландарихьна сюгьбатнан аьхириъ Исрапил Маллаев.
