Гьар йисан сентябрин 3-пи йигъан Урусатдиъ терроризмдихъди вуйи женгнаъ сатIивал улупру Йигъ къайд апIуру. Думу йигъ, 2004-пи йисан сентябрин 1-3-пи йигъари террористари Беслан шагьриъ мектеб дибисну, 300-тIан артухъ инсанар, гизафси дишагьлийир ва бицIидар, йихувалихъди аьлакьалу ву. Думу гъагъи йигъар ихь уьлкейин тарихдиъ, инсанарин юкIвариъ гьаргандиз гъузди.

 

Му йигъ къайд апIувал – гьюкумат ва жямяаьтлугъ терроризмдихъди вуйи женгнаъ сатIи вуйивалин лишан ву. Му йигъан Бесландиъ, Москвайиъ Дубровка кючейиъ айи театрин центриъ, Буденновскдиъ, Первомайскдиъ, Москвайиъ, Буйнакскдиъ, Волгодонскдиъ ва гьацира варжариинди жара террактариъ террористарин гьюжмин натижайиъ гъийиху агъзрариинди ватандашар кIваин апIури шулхьа. Гьелбетда, гизафдарин думу гъагъи йигъар затра кIваълан гъягъидар.

РФ-дин ХатIасузвалин Советдин секретарь Николай Патрушевди къайд гъапIганси, Урусатдиъ террориствалин гьяракатарин дережа 2020-пи йисхъан мина 30 ражари ис, хъа террактарин кьадар 10 ражари цIиб гъабхьну. Николай Патрушевдин гафариинди, террористари чпин ляхнин ери гьарган мюгькам апIура, деврин техникайин дакьатар ишлетмиш апIура, жиниди ляхин апIувал давам шула.

Эгер террактарин кьадарнакан улхуруш, варитIан гизаф дурар Дагъустандин сяргьятариин духьна. Ихь республикайиъ террориствалин гьюжмари зарар тутруву хизан тек-бирра адар. Гизафси му террактариъ къанун уьбхру органарин вакилар, диндин кIулиъ айидар, дявдин гъуллугъчйир, ватандаш инсанар гъийихну.

Гьамусяаьт террориствалин гьяракатар яваш духьнайиси рябкъюри ашра, статистикайин улупбари кIваз рягьят хьуз гъитрадар. 2019-пи йисан Дагъустандиъ террориствалин ва экстремиствалин жюрейин 423 тахсиркарвал дапIна.

Вушра, къанун уьбхру органари ва жямяаьтлугъди гъабхурайи ляхни ужудар натижйирихъна духна. Террориствалихъди женг гъабхбаъ сабвал улупувал чарасуз лазим ву.