Йишвариин ерли гьюкум тешкил ва тамам апIурайи касар халкьдиз варитIан багахь ву. Гъулахъ юкIв убгру глава хьувал фунуб гъулазра, аьхю хъуркьувалси, дидин артмиш’валин диб вуйибра къайд апIуз шулу.
Жиниб дар, аьхиримжи йисари сечкйир гъахбаъ, улихьдин вахтарихь тевиш, думукьан гъизгъинвал рябкъюри имдар. Муниципалитетдин глава райондин Собраниейин депутатари, ерли поселениейин глава гъулан Собраниейин депутатари тасдикь апIбан къайда кьувватнаъ ипна.
Ерли Собранйириз депутатар ктагъбан сечкйир гъахуз имбудар сакьюдар йигъартIан дар. Коронавирус уьзур тарабгъбаз аькси уьлчмйир кьабул апIбахъди аьлакьалу вуди, сентябрин 11-12-пи йигъари вахтназ улихьна сес тувуз ккунидариз ихтияр тувна. Хъа 13-пи сентябриъ асас сечкйир кIули гъягъиди. Шаксуз, му серенжем гьарсаб гъулан агьалийиз важиблу ву. Сечкйириз гьязурлугарра вахтназ улихьна кIули духна.
Хив ТИК-дин кIулиъ айи Исрафил Сялигьовди къайд апIурайиганси, сечкйир гъахру йигъан сечкйирин ачухъвализ, йишвариин сечкичйир артухъди жалб апIбаз лазим вуйи фикир тувра.
– Улупнайи сечкйирихьна гьязурлугар гъахбан жавабдарвал йишвариин гъабхура. Ич терефнаан учу лазим вуйи насигьятар ва теклифар туврача. Райондиъ сечкйир гъахбан бадали, 35 УИК-диъ ляхин гъабхиди.
Сечкйир гъахру ужагъарин гьязурлуг’валикан гъапиш, вари ужагъар материалинна техникайин алатарихъди тямин дапIна. КьатI’иди гъапиш, улупнайи ужагъар электрикдин аьлава акв тувру гъурулушарихъди, аьлакьайин алатарихъди, компьютерихъди ва аьлава лазим вуйи бакришнарихъди тямин дапIну хьиди. Гьацира, гъийин гьякьикьат фикриъ дюбхну, хатIасузвал уьбхбан месэлйириз дикъат тувуб чарасуз лазим ву. Гьарсаб УИК маскйирихъди, бегьли-йирихъди, антисептикарихъди тямин апIувал гюзчиваликк кка.
Сечкйириъ иштирак хьуз гьязур вуйи 230 кандидатдихьан аьрзйир кьабул гъапIну. Гьадму гьисабнаан 11 касди чпин хушниинди кандидатура алдабгъну, имбуну 219 касдин сиягьдиан чпиз гьюкмин улихь маракьлуди ва мянфяаьтлуди рякъюрайи вакиларихъан сечкичйири сесер тувди.
Къайд апIурза, ерли дережайин сечкйир гьарсаб девриъ гъизгъинди, заан иштирак’валиинди кIули гъягъюру. Му ражнура сечкйир ужуб дережа-йиъди кIули гъягърувалиин инанмиш вуза. Сечкйир тешкиллувалиинди кIули гъахувал гьарсар ватандашди чан улихь дивнайи меселйир вахтниинди ва ерийиинди тамам апIбакан асиллу хьиди. Сечкйирин натижайиъ саки гьарсаб гъулаъ гьюкмин улихь, чан халкьдихъан юкIв убгури, баркаллуди зегьмет зигру кас шлувалик умуд кивурхьа, – аьлава гъапIну дугъу.
