Табасаран спортсменари спортдин жюрбежюр жюрйириан гъадагъурайи хъуркьувалари ва гъалибвалари гьарган ихь юкIвар шад апIуру. Спортдиъ гъалибвал гъадабгърудар, гьелбетда, бажаранлу, чпин улихь дивнайи метлеб кIулиз адабгъуз вари кьувватар ишлетмиш апIру, дирбаш касар ву. Спорт – му гьар йигъандин гъагъи зегьметси, хъуркьувалари хурайи шадвалра, сагъу уьмрин жилгъара ву. Спортдиъ рягьятвал гъадабгъру вахт адар, спортсменари, гележегдиъ гъалибвалар гъадабгъбан бадали, гьар йигъан чпин аьгъюваларин дережа за дапIну ккунду.
Улихьна йисари спортдиин машгъул духьнайи табасаран баяр цIибтIан адайи. Белки, думу йисари спортдиин машгъул хьуз гьамусдин девриъсдар мумкинвалар адайшул. Аьхиримжи йисари районариъра, гъулариъра кмиди спортдин майднар ачмиш апIури, мектебариъ спортдиз артухъ фикир тувуз хъюгъна. Саб гафниинди, табасаран баярин уьмриъ спортди лайикьлу йишв бисура.
Учу «Табасарандин нурар» газатдин машариъ кми-кмиди табасаран спортсменарикан мялуматар туври шулча. Гъийин макьалайин игит Иваново шагьриъ яшамиш шулайи Хив райондин Заан Яракк гъулан вакил Умахан Сафарчиев ву. Улихьна йигъари Курск шагьриъ грепплингдиан РФ-дин Кьялан федералин округдин чемпионат кIули гъубшну. Душваъ Урусатдин чемпионатдиз гъалибчйир гъядягъбан талитар кIули гъушнийи. Талитариъ 62 кило гъагъ айи спортсменарин арайиъ кIули гъушу кчIихбарин шубуб талитнаъ гъалиб духьну, ихь бали сабпи йишв гъадабгъну.
Умахан Сафарчиев чан 5 йис тамам гъабхьихъан мина спортдиин машгъул духьнайир ву. Думу сифте, пучIу атлетикайиз гъягъюри, гимнастикайиин машгъул духьнайи. Чан яш 13 йис гъабхьиган, Умахан Сафарчиев юкьяр дисбан спортдиз гъафнийи. Хъа 16 йисаъ ади Умахан кчIихбарин грепплинг жюрейин спортдин талитариъ иштирак хьуз хъюгъну. Гьамусяаьт балин 20 йис дубхьна, дугъу ужудар хъуркьувалар улупура.
«Грепплингди къайдалувал вердиш, бедендин сагъламвал мюгькам апIуру, хъа му зигьимдин артмиш’валсира гьисаб шулу. Спортдин жара кчIихбарик гъилигиган, грепплинг – кчIихбарин искусствойин жигьил жюре ву. Дидиъ спортдин жюрбежюр кчIихбарин техника сатIи дапIна. Узу гьамус хъана аьхю аьшкьниинди Урусатдин чемпионатдиз ва Урусатдин кубок бадали вуйи талитариз гьязур хьидиза, фицики, узуз ужудар мумкинвалар айивал дябкъназуз»,
– гъапну ич сюгьбатнаъ Умахан Сафарчиевди.
Умахан Сафарчиевдиз жандин мюгькам сагъ’вал, чан уьмриъ спортдиан заан хъуркьувалар гъадагъувал, кмикмиди гъалибвалин шадвалар гьисс апIувал ккун апIурача.
