Табасаран райондин кьялан больницайиъ, коронавирусдин инфекцияйиан аьзарлу духьну, 7 кас, хъа гъурдларин пневмония арайиз дуфну, 39 кас дахъна. Дидин гьякьнаан муниципалитетдин аьтрафариин коронавирусдин инфекцияйиз аьксивал улупбан гьяракатнан штабдин заседаниейиъ кьялан больницайин кIулиъ айи духтир Авсередин Мирзабеговди мялумат тувну.

 

Заседаниейин ляхин ачмиш апIури, райондин глава Мягьямед Къурбановди къайд гъапIганси, вари республикайиъси Табасаран райондиъра сарикан тмунурикна тарабгъру гъурдларин уьзриан аьзарлу шулайидарин кьалдар артухъ шула. «Райондин агьалйир инфекция тарабгъбахьан уьрхбан бадали, кьабул апIурайи серенжемар мюгькам апIувал чарасуз лазим ву», – гъапну М.Къурбановди.

Авсередин Мирзабеговди больницайиъ лазим вуйи дармнар, чпин сагъламвал уьбхбан бадали духтрари алахьру палтар, маскйир, дезинфекция апIру дармнар бегьемди айивал къайд гъапIнийи.

Гьяракатнан штабдин заседаниейиъ, коронавирусдиз аьксивал улупбан бадали, кьабул дапIнайи серенжемар 28-пи сентябрихъан мина цIийикIултIан ижми апIбан гьякьнаан къарар адабгънийи. Гьадму гьисабнак жямяаьтлугъ йишвариъ маска алди лицувал, культурайин мяракйир-мажлисариъ иштирак шулайи инсанарин кьадар тяйин апIувал, хъяркьнайи кафе-ресторанарин, сумчрар гъахру заларин ляхин яваш апIувал, мектебариъ мялимари маскйир алахьувал кахьра.