Жара гьюкуматариан гъулан мяишатдин итIру сурсатар хувал кам апIбан, гьадму сурсатар ухьухь гьясил апIувал арт-миш апIбан программайиъ Дагъустан жанлувалиинди иштирак шула ва ужудар натижйирра улупура.

 

Аьхиримжи вахтари му программайин дахилнаъди республикайин аьтрафариин хайлин йимишарин багълар кивна, гьадму гьисабнаан гизаф бегьер хру багъларра (саб гектариъ 800 гьар).

Гизаф бегьер хру багълар кивбаз гьюкуматдин терефнаан федералин бюджетдиан субсидйир жюрейиинди кюмек апIура.

Мицдар багълар кивбан бадали, гизаф харжарра удучIвура, гьаддиз му жюрейин проектар уьмриз кечирмиш апIуз меценатар жалб дапIну ккунду.

Къайд апIуз ккундузузки, 2013-пи йисхъан мина Дагъустан Республикайиъ гъулан мяишат артмиш апIбиин ужуди машгъул духьна. Хайлин йимишарин, тIумтIин багълар кивна, хутIлар урзура. Йигълан-йигъаз лихру йишварра ачмиш апIура. Хъа лихру йишварин кьадар хутIлариътIан багълариъ артухъди ву. Мисал вуди гъадабгъиш, 100 гектарин хутIлариъ лихуз 5 кас чяаьн ву, хъа гьадму кьдарнан багълариъ 40-100 кас лихуру.

Гьаддиз, артухъди лихру йишвар ачмиш ва харижи гьюкуматариан хурайи йимишар ухьухь гьясил апIувал себеб вуди, аьхиримжи вахтари саки вари муниципалитетариъ йимишарин багълар кивра.

Гизаф бегьер хру жвугърийирин ва хъана жара йимишарин багъ 25 гектариъ киври, гьамусяаьтна Дербент райондин Селюк гъулан агьали Фатяли Наврузялиев гьяракатнаъ а.
Гъийин йигъаз мушваъ 7 агъзур кубайин шид уч апIру йишв гьязур апIбан тикилишчивалин ляхнар аьхирихъна гъюра. ЛитIнариинди гьарарихъ шид хъубзуз лазим шлу вари алатар Воронеж шагьриан вуйи фирмайи гьязур апIура, ва ццийин чвлин вазари 18 гектараъ жвугърийирин, беълийирин ва худун гьелемар кивуз планламиш дапIна, хъа имбуну йишвак гьелемар гъюру йисан хьадук-ран вазари кивди.

Пуб лазим вуки, проект уьмриз кечирмиш апIбан аьхириъ жвугърийирин гьаму багъ республикайиъ варитIан аьхюб ва гизаф бегьер хруб хьибди. Гьаддихъди сабси, инсанариз лихру йишварра ачмиш хьиди.