Гьаму йигъари Урусатдин Хив райондиъ айи ОМВД-йин участокдин вари ихтиярар айи полицияйин вакил, 2-пи ва 3-пи нумрйирин участокарин дахилнаъ айи «Ургъа сельсовет», «Ляхла сельсовет», «Асккан Яракк сельсовет», «Зилдккарин гъул» ва «Мажвгул сельсовет» гъуларин поселенйирин игьтияжариз гъуллугъ апIурайи, полицияйин аьхюнур лейтенант Владик Аьбдуллаевдин йисандин арайиъ гъапIу ляхин гьякь-гьисаб тувбан серенжем кIули гъубшнийи.
Гьякь-гьисаб тувбан серенжем Хив райондин Асккан Яракк гъулан культурайин хулаъ тешкил гъапIнийи. Дидиъ Урусатдин Хив райондиъ айи ОМВД-йин начальник Камал Гьясанов, МП ОМВД-йин начальник Гьейбатуллагь Гьяжимурадов, ОГИБДД-йин начальник Мурад Жяфаров ва ухьу зиихъ кудухнайи гъуларин администрацйириан дуфнайи вакилар иштирак гъахьнийи. Къайд дапIну ккундуки, гьякь-гьисаб тувбан серенжем, инсандин сагъламвал уьбхбан вари шартIар ва вазифйир заан дережайиъди уьрхюри, кIули гъубшнийии.
3-пи нумрайин участокдиз Владик Аьбдуллаевди 2018-пи йисан 1-пи январихъан мина регьбервал туврайи, хъа 2-пи нумрайин участокдиз – 2020-пи йисан август вазлихъан мина.
Чан гьякь-гьисаб тувбан удучIвну улхбаъ Вла-дик Везировичди къайд гъапIганси, дугъу игьтияжариз гъуллугъ апIурайи гъулан поселенйирин сиягьназ Фурдагъ, Ургъа, ВертIил, Атрик, ХурсатIил, Ляхла, Гьарик, Ккувигъ, УртIил, Асккан Яракк, Яргъил, Заан Яракк, Зюрдягъ, Зилдикк, Мажвгул ва ЧIира гъулар дахил шула.
Дугъу чан удучIвну улхбаъ му гъуларин ругариин яшамиш шулайи 2840 касдихъди, ариш-веричишвал апIурайи 15 тукандихъди, 4 заан дережайин, 3 кьялан дережайин, 1 бегьем дару мектебдихъди, бицIидарин 3 багъдихъди, гъван адабцIурайи 6 карьерихъди, халачйир гьясил апIурайи 2 фабрикайихъди, гъулариан чIюрх-чIувал гъабхурайи машинарихъди, му ругариин ерлешмиш духьнайи ФАП-арихъди, сиягьдин гьисабнаъ дийигънайи 145 касдихъди чав гъабхурайи ляхникан кьатI’иди ва мяналуди ктибтнийи.
Уч духьнайидари, гьякь-гьисаб тувбан серенжемдиъ заан дережайин иштирак’вал улупури, сикин дарди жюрбежюр суалар хъирчрайи. Хив райондиъ айи ОМВД-йин начальникра йишв’ин илмиди, чпи гъавриъ адру мялуматарин гъаврикк ккауз чарйир гъагнийи ва чпин суалар гьял апIуз къарар адабгънийи.
Гьякь-гьисаб тувбан аьхи-риъ, гъуларин вакилари Владик Аьбдуллаевдиз, чпиз йирфар диривди, чпихъди сатIиди мяналу ляхин гъабхбаз чухсагъул мялум гъапIнийи.
