Ноябрин 5-диан 8-дизкьан Сербия гьюкуматдин Нови-Сад шагьриъ спортдин самбойиан вари дюн’яйин чемпионат кIули гъубшну.
Думу чемпионатдиъ Урусатдин регионарианра спортсменар иштирак гъахьну. Гьадрарин арайиъ Табасаран райондин Хюрикк гъул’ан вуйи, Ивановский областдин Кинешма шагьриъ яшамиш шулайи Мягьмуд Къурбановра а.
КIули гъушу талитариъ 70 кило гъагъ айи спортсменарин арайиъ ихь ватанагьлийи арсран медаль гъадабгъну.
Му бай гьеле бицIидимиди спортдиин машгъул духьнайир ву. Мисал вуди гъадабгъиш, 2016-пи йисан думу самбойиан Урусатдин талитариъ гъалибчи гъахьну. Гьаму жюрейин талитариъ 2017-пи йисан думу 3-пи йишван, хъа 2020-пи йисан – 2-пи йишван сагьиб гъахьнийи. Магьа цци самбойиан кIули гъубшу вари дюн’яйин чемпионатдиъра дугъу заан натижа улупну.
Ич арайиъ гъабхьи сюгьбатнаъ спортсменди мялум гъапIганси, гьамусяаьт дугъу МГУ-йиъ «Москвайин экономикайин мектеб» факультетдин сабпи курснаъ урхура. Спортдиин машгъул духьнайивали дугъан урхурайивализ зат манигъ’вал апIурадар.
Гъит, гележегдиъра Мягьмуддиз хъана заан хъуркьувалар ишри.
