10-пи ноябриъ Табасаран райондин Гьесихъ гъулаъ цIийи рякъ ачмиш апIбан шадлугънан мярака кIули гъубшну. Дидиъ Табасаран райондин глава Мягьямед Къурбанов, РД-йин Халкьдин Собраниейин депутат Алавудин Мирзабалаев, РД-йин рякъярин ва транспортдин министрин заместитель Мягьямед ТIагьиров, Табасаран райондин ОМВД-йин начальник Насир Ягъибегов, «Дагъавтодор» ГКУ-йин, «Дорстройтех» ООО-йин вакилар иштирак гъахьнийи.
Серенжем ачмиш апIури, Жулжагъ гъулан советдин глава Шагьимерден Гьясанаваевди Гьесихъ гъулан жямяаьт му важиблу гьядисайихъди кIваантIан тебрик гъапIнийи. Дугъу Дагъустан Республикайин транспортдин ва рякъярин министрин заместителди лихурайи Мягьямед ТIагьировдиз ва Гьяжияв Аьбдусаламов кIули ади «Дорстройтех» ООО-йин коллективдиз чухсагъул мялум гъапIнийи.
Табасаран райондин кIулиъ айи Мягьямед Къурбановди чан терефнаанра рякъ апIури зегьмет гъизигу касариз, «Дагъавтодор» ГКУ-йин улихь-кIулихь хьайидариз ва Дагъустандин рякъяринна транспортдин министерствойиз Табасаран райондиз туву кюмекназ ва Гьесихъ гъулан жямяаьт бадали гъизигу зегьметназ чухсагъул гъапнийи.
«Гъулан гъюзимбу уьмур гизафси рякъярикан асиллу ву. Рякъяр уьмрин табар ву», – гъапнийи райондин главайи ва цIийи рякъ хайлин вахтари либхуз гьесхъарин жямяаьтдин вакилариз мюгькам сагъ’вал ккун гъапIнийи. Хъасин дугъу, рякъ тикмиш апIури, намуслу зегьметниинди тафавутлу гъахьи касар пешкешарихъди лишанлу гъапIнийи. Райондин администрацияйин гьюрматнан грамотйириз «Дорстройтех» ООО-йин начальник Гьяжияв Аьбдусаламов ва коллективдин сар-швнур вакил лайикьлу гъахьнийи. Расвалин ляхнар кIули гъахуз кюмек туву Гьесихъ гъулан саб жерге агьалйирра грамотйириинди лишанлу гъапIнийи, гьадму гьисабнаъ Гюлягьмед Пирмягьямедов, Камил Сяи-дов, Шихмягьямед Эскеров, Аьликерим Асланов, Кумсият Пирмягьямедова, Зильфира Пирмягьямедова, Вадим Аьгьмедов ва Муслим Мягьямедовайи.
Гьесихъ гъулан жямяаьтдин терефнаан гъулан яшлу касар Мямяткерим Асланов ва Зияудин Аьгьмедов удучIвну гъулхнийи. «Гьаму терефнаъ яшамиш шулайи вари гъуларин жямяаьтарин, му рякъ къайдайиз хайиз ккилигури, гизаф вахт вуйи, гьаз гъапиш чвлин вахтна рякъюъ гизаф батIрар шуйи, хъа кьюрдну кIуруш, узди гъюрайи рякъюъди машин хъапIуз лап читинди вуйи», – гъапнийи яшлуйири.
Дурари гъуландарин терефнаан рякъ тикмиш апIури зегьмет гъизигу вари касариз ва гъулазди гъюрайи рякъ федералин программайик кипуз кюмек тувбаз Дагъустан Республикайин Халкьдин Собраниейин депутат Алавудин Мирзабалаевдиз ва Табасаран райондин глава Мягьямед Къурбановдиз жаради чухсагъул мялум гъапIнийи.
«Дагъстройтех» ООО-йин генеральный директор Гьяжияв Аьбдусаламовди чан ва коллективдин терефнаан Гьесихъ гъулан жямяаьтдиз, рякъяриин лихурайи чпин идарайин гъуллугъчйириз жюрбежюр кюмекар тувбаз лигну, чухсагъул гъапнийи ва рякъ’ин зегьмет гъизигу гъулан хайлин жигьилариз пешкешар ва пул айи конвертар тувнийи.
Алавудин Мирзабалаевди, Гьесихъ гъулан жямяаьт цIийи рякъюхъди мубарак апIури, учв Жулжагъ гъулан терефнаан депутатди гъахьиган, Гьесихъ гъулаз рякъ апIурза кIури, туву гаф кIваин гъапIнийи. «Магьа ихь гъапи гаф тамам гъабхьну», – гъапнийи дугъу.
Серенжемдиъ гьацира Мягьячгъалайиан дуфнайи хяларра удучIвну гъулхнийи ва Гьесхъарин жямяаьт цIийи рякъюхъди мубарак гъапIнийи. Гьесхъарин гъулан мектебдин директор, райондин Собраниейин депутат Шихмягьямед Пирмягьямедовди гъулан жямяаьтдин терефнаан «Дор-стройтех» ООО-йин учас-токдин начальник Хизри Гьябибовдиз, рякъюн месэла гьял апIбаз туву кюмекназ лигну, пешкешди халичи тувнийи.
Хъасин рякъ ачмиш апIури, дуфнайи хялари ва гъулан жямяаьтдин улихь хьайи касари уьру лента гьадабтIнийи.
Серенжем аьхю концертдиинди давам гъабхьнийи. Дидиъ Мягьячгъала шагьриан дуфнайи ялхъвнарин ва мяълийирин ансамбль, табасаран артистар Оксана Ибрагьимова, Мурад Гьяжикъурбанов, Тельман Аьбдуллаев, За-карья Амирбегов, Замир Мягьямедисинов, Тимур Аьгьмедов ва Аьбдурягьман Мягьямедялиев иштирак гъахьнийи.
Къайд апIуз ккундузуз, цIийи алапIу рякъюн манзил 6 километр ву, яркьушин 8 метр. Расвалин ляхнариз 54 000 000 манат харж гъапIну.
