Коррупция, дикъатлуди фикир тувиш, гьюкмин улихь марцци ляхин гъабхбан бадали, жюрбежюр гъуллугъариина тяйин дапIнайи касар масу гъадагъувал гьисаб шула. Лазим йи-швахь руш’ват тувну, агьалйири чпин метлебар бегьем апIувал, асас вуди ихь республикайиъ, аьдат дубхьна. Жвуван маракьар уьрхюри, сифте руш’ват тувуз гьялак шулахьа, амма гьаз-вуш кьяляхъна думу гъадабгъурайидар тянкьидра апIурахьа. Мициб гьякьикьатдиз гьякьлу кьимат тувубра читин шула.
Руш’ватчивалихъди йишвариин арайиз дуфнайи аьгьвалат дигиш апIбан бадали, мялум вуйиганси, аьхиримжи вахтна къанунарра хайлин ижми дапIна, вушра гьелелиг му жигьатнаан камивалар гизаф гъузра.
Агьалйирин сагъу кьувватарихъди гъуху гюрюшариан мялум шулайиганси, яша-йишдин артмиш’валиъ, агьалйирин гьюкмихьна хъугъ’вал тямин апIбаъ манигъ’вал апIурайи месэлйирин арайиъ руш’ватчивали асас йишв бисура.
Урусатдиъ къанунар ва къайдйир уьрхбан рякъюъ асас йишв бисурайи прокуратурайин гъуллугъчйири коррупцияйиз аьксиди серенжемар гъахувал хайлин жанлу дапIна, натижйирра а.
Дагъустандиъ гъахурайи серенжемариз асас вуди, Хив райондин прокуратурайин вакиларира руш’ватчивализ аьксиди женг гъабхувал жанлу дапIна.
Хив райондин прокурор, юстицияйин аьхюнур теклифчи Самурхан Наврузовдин гафариан мялум шулайиганси, руш’ват тувбахъди, думу гъадабгъбахъди гъабхурайи женг натижалуб хьувал хайлин терефариан жямяаьтлугъдикан асиллу шула.
– Зиихъ улупнайи месэлайин гьякьнаан учу сикин дарди саб жерге уьлчмйир кьабул апIурача. Амма, гъуху ахтармишариан ашкар шулайиганси, фукьан гъаврикк ккаъбан ляхин гъубхишра, улхбар къуру гафарди гъузра. Дидихъди сабси, гьюкмин саб жерге вакилари гъуллугънан йишв чпин хусуси хайирназ ишлетмиш апIбан дюшюшарра текрар шула. Гъябгъюрайи йисан улупнайи вахтназ райондиъ руш’ватчивалихъди аьлакьалу 7 тахсиркарвал дапIна. Гьадму гьисабнаан Хив прокуратурайи, РФ-дин Уголовный Кодексдин 285-пи маддайин 3-пи пайназ асас вуди, тахсиркарвал ачмиш гъапIну. Мушваъ райондин сабнуб ерли поселениейин улихьди гъуллугъниин гъахьи главайи дапIнайи тахсиркарвалин кьимат 5 миллионтIан артухъ ву.
Дидихъди сабси, улихьнаси райондиъ къанунар уьрхбан гъуллугънаъ айи касди руш’ват гъадабгъувалин дюшюшра ашкар дапIна. Дидин гьякьнаан уголовный дело гъитIибккна. Гьелелиг силис ккудубкIнадар.
Зиихъ улупнайи тахсиркарваларилан савайи, гъябгъюрайи йисан райондин сяргьятариин ватандашари рякъ-хулин къайда чIур апIбан натижайиъ, чпи административ тахсиркарваликкан ккадаувал тIалаб апIури, рякъярин къанун ва къайда уьбхюрайи ГИБДД-йин гъуллугъчйириз руш’ват тувбан 5 дюшюш гьисабназ гъадагъна. Улупнайи шубрид тахсиркрарин гьякьнаанра уголовный делойир гъитIирккну, дурарин тялукь журум апIбан бадали, суддиз хътаъну.
Къайд апIураза, жямяаьтлугъ вакиларикан кми-кмиди ебхьруганси, йишвариин агьалйирин гъазанжартIан харжар артухъ удучIвбан дюшюшар гъузра. Мициб аьгьвалатнаъ хизандин харжар дидин вакиларин шубуд йисандин уьмуми гъазанжартIан артухъ удучIвурайивал шакнакк гъабхьиш, райондин прокурори республикайин прокурориз мялум апIувал, хъа дугъу, чан нубатнаъди, тялукь ахтармишар гъахувал лазим вуйибдин гьякьнаан республикайин Главайиз мялумат дебккувал лазим ву, – гъапну С.Наврузовди. – Дарпиди гъитуз шулдарзухьан: руш’ватчивализ аькси серенжемар гъахбаъ агьалйирин кюмек чарасуз лазим ву. Хъа ухьу гьапIра: коррупция улхбариинди тянкьид апIурахьа, руш’ват гъадабгъурайидар ухьуз аьгъю вари саягъариинди биябур апIуз зегьмет зигурахьа, амма гьадму саб вахтна гьарсар кас, чан жюрбежюр хусуси маракьар уьрхбан гъайгъушнаъ ади, къанунсуз рякъяр ишлетмиш дапIну, руш’ват тувуз гьялак шула. Хушниинди руш’ват тувувалра, руш’ват гъадабгъувалра тахсиркарвал ву. Кьюбиб дюшюшариъра къанундиъ жаза улупна.
Жямяаьтлугъдихьна илтIикIури, пуз ккундузуз: гьюрматлу ватандашар! Руш’ват тувуз гьялак махьанай! Учвхьан руш’ват тIалаб апIурайи дюшюшариъ жавабдар гъуллугъарихьна илтIикIай! Прокуратурайиз хьади дуфну, кьабул гъапIу гьарсаб аьрзайин натижайихъан узу жаваб тувраза. Къанундин бинайиинди гьарсариз кюмек тувуз учу гьязур вуча, – аьлава гъапIну дугъу.
С.Наврузовди къайд апIу-райиганси, жямяаьтлугъдин вижнасузвалин натижайиъ аьгьвалат гъагъи апIура. Хъа фикир тувай: жвуван дерди тамам апIбан бадали, ухькан гьарсар лазим йишвахь «гьюрматнан хил» гьачIабккуз мажбур шулахьа. Улупнайи месэлайин гьякьнаан сикин дарди улхуз шулу. Мушваъ гьарсариз чан гьякь а, гьаддиз тамам жаваб адру суаларра хайлин гъузра.
