Вахтназ вуди Дагъустан Республикайин Главайин вазифйир кIулиз адагъурайи Сергей Меликовди ноябрин 24-пи йигъан региондин правительство отставкайиз гьапIну. Дидин гьякьнаан Дагъустандин Главайин ва Правительствойин мялуматарин гъуллугънаан хабар тувну.
«Дагъустан Республикайин Конституцияйин 78-пи ва 91-пи маддйириз асас духьну, вахтназ вуди Дагъустандин Главайин вазифйир тамам апIурайи Сергей Меликовди чан Указдиинди Дагъустан Республикайин Правительство отставкайиз гьапIну», – дупна мялуматнаъ.
Вахтназ вуди региондин правительствойин председателди Аьбдулпатагь Амирханов тяйин дапIна. Республикайин цIийи правительство тешкил апIайиз, улихьди айи правительствойин членари чпин вазифйир тамам апIиди.
Вахтназ вуди Дагъустандин Правительствойин председателин вазифйир тамам апIурайи Аьбдулпатагь Амирхановди гьюкмин гъуллугъариин алидар дигиш апIуз хъюгъна.
Гьамци дугъу, чпин хушниинди аьрза дибикIну, Дагъустан Республикайин Правительствойин секретариатдин кIулиъ айи Игорь Губайдуллин ва РД-йин Правительствойин председателин заместителар, шубур теклифчи – Булат Хайрудинов, Ленар Сабиров, Илья Соколов ва сар кюмекчи Рамиль Кьадыров гъуллугъарихьан азад гъапIну.
Гъуллугъарихьан азад гъапIу вари гъуллугъчйир Татарстандиан ву. Дурар Артем Здуновди республикайиъ премьер-министрди ляхин апIурайи вахтна гъуллугъариъ тяйин гъапIдар вуйи.
КIваина хурача, Аьбдулпатагь Амирханов вахтназ вуди Дагъустандин премьер-министрин гъуллугънаъ РД-йин Правительствойин цIийи членар ктагъайизкьан гъузди.
