Меденият, шаксуз, халкьдин милли сурат ву. Думу аьсрариинди халкьдин яшайишдиъ текрар шулайи милли ирс вуйиб гьисабназ гъадабгъну, аьхиримжи йисари йишвариин культура мюгькам апIбан серенжемар гъахувал хайлин жанлу дапIна.

 

Гьаци, культурайин ужа-гъарин аьгьвалат ужу алапIбан бадали, цIийи тикилишар дивбаз, айидар дибдиан рас апIбаз дикъатлу фикир тувра.
24-пи ноябриъ Хив райондин Фурдагъ гъулаъ культурайин цIийи Хал ачмиш гъапIну. Гьелбетда, му шадлугънан мярака гъулан ва вари райондин тарихдиз нубатнан шадвалин гьядиса ву.

Улупнайи серенжемдиз гъуландарихъди шадвал пай апIуз «Хивский район» МО-йин глава Ярмет Ярметов кIулиъ ади райондин актив ва саб жерге жара хяларра уч духьнайи.
Шадлугънан мярака ачмиш апIури, райондин культура-йинна спортдин, жигьиларин месэлйириз лигру ва туризмдин отделин начальник Казбек Къазиевди, учвра Фурдагъ гъулан агьали вуйиб гьисабназ гъадабгъну, хялар къаршуламиш гъапIну. Гъулан агьалйириз тялукь пешкеш гъапIу райондин кIулиъ айидариз чухсагъул гъапну. Хъа мяракайиъ удучIвну улхуз сифте райондин главайиз гаф тувнийи.

– Республика цIийи алапIбан тереф уьбхюри, йи-швариин агьалйирин яшайиш артмиш апIбан меселйир ухьуз варитIан важиблу вухьуз. Хив район артмиш апIбан уьлчм-йир кьабул апIури, ухьу саб жерге натижйир гъазанмиш дапIнахьа. Гьаци ерли бюджетдин кьувватариинди гъи фурдгъариз медениятдин цIийи Хал ачмиш апIурахьа.

Тазади абццрайи ужагъди сифте нубатнаъди гъулан жигьилариз яратмиш апIбан рякъ’ан чпин удукьувалар улупуз цIийи мумкинвалар тувра.

Гъит, му культурайин цIийи Хал Фурдагъ гъулан, вари гъунна дерейин, райондин, Урусатдин жямяаьтлугъдин хайирназ ишлетмиш апIруб ибшри! – къайд гъапIну Ярмет Ярметовди.

Гъуландариз тялукь пешкеш багъиш апIбаз райондин руководствойиз чухсагъул мялум апIури, гъуландарин терефнаан мяракайиин саб жерге агъсакъларра удучIвну гъулхнийи.

РД-йин культурайин лайикьлу артист Марьям Къазиевайи ва райондин культурайин гъуллугъчйири гьязур дапIнайи концертди мярака лапра маракьлу гъапIну.