26-пи ноябриъ Табасаран райондин Хючна гъулаъ Урусатдин гъулан жигьиларин союздин (РССМ) ерли отделениейиъ муниципалин мялуматарин центр ачмиш гъапIну. Думу «Гъул. Артмиш’валин аьтраф» проектдин дахилнаъди абццнайиб ву. Райцентриъ почтайин гъвалахъ хъайи дараматдин 3-пи мертебайиъ ерлешмиш дубхьнайи центрин асас вазифйир – райондин жигьилариз грантар гъадагъуз аьрзар тувуз, гьюкуматдин жюрбежюр программйириъ иштирак хьуз, хъа гъалиб гъахьиган, дицдар проектар уьмриз кечирмиш апIуз кюмек тувувал ву.

 

 

«Йиз фикриан, гьамциб центр ачмиш апIувал Табасаран райондиъ айи жигьилариз аьхю уьмарат ву, дурарихьан, центриз дуфну, чпиз лазим вуйи мялумат гъадабгъуз, гьацира чпин вахт мянфяаьтлуди адапIуз шулу. Гьамцдар центрар жара районариъра ачмиш дапIну ккунду», – гъапнийи Дагъустан Республикайин жигъиларин ляхнариз лигру министр Камиль Сяидовди, ВКС-дин къайдайиинди серенжемдин иштиракчйирихъди аьлакьайиз удучIвну.

Му центр ачмиш апIували Табасаран райондиъ айи РССМ-дин ерли отделениейин вакиларин кIубанваликан кIура, фицики дурари Урусатдин Президентдин фонднан грант гъадабгъну, 1 600 000 манат пулихъ чпин утагъра рас гъапIну, чпиз лазим вуйи авадлугъарра масу гъадагъну.

«РССМ-дин Дагъустандиъ айи региондин отделениейиз, аьрз дапIну, президентдин грантдиъ гъалиб хьпаз чухсагъул кIураза. Мялуматарин му центри Табасаран райондин жигьилар сатIи апIур кIури, умуд кивдихьа. Жигьиларихьан му центриъ чпин кIваъ айи хиялар уьмриз кечирмиш, жюрбежюр проектар гьязур апIуз, волонтёрваларин гьяракатнаъра иштирак хьуз ва гьацира жара ляхнар тамам апIуз шулу», – гъапнийи ВКС-дин къайдайиинди серенжемдиъ иштирак шулайи РССМ-дин председатель, «Гъул. Артмиш’валин аьтраф» проектдин вакил Юлия Оглобинайи.

«Учуз гъулан жигьилари, чпин кIваъ айи хиялар арайиз адагъну, чпик кайи гьунарар улупну ккундучуз. Гьадму метлеб ади жюрбежюр серенжемар кIули гъахбан бадали, учу планар йитIурача», – хабар тувну региондин отделениейин председатель, Дагъустан Республикайиъ «Гъул. Артмиш’валин аьтраф» проектдин ляхнар дюзди гъюруганси ккабалгурайи Рашид Аьбдуллаевди.

Серенжемдиъ гьацира Табасаран райондин имам, табасаран чIалниинди чапдиан удубчIвурайи «Ас-Салам» газатдин редактор Ансар Рамазановра удучIвну гъулхнийи. Дугъу серенжемдиз уч духьнайидар Табасаран райондиъ мялуматарин цIийи центр абццбахъди мубарак гъапIнийи ва чан терефнаанра гьар вахтна жигьилариз кюмек тувуз гьязур вуйиваликан гъапнийи.

«Гъулариъ хайлин гьял дарапIу месэлйир гъузна, партияйин терефнаан кюмек дапIну ккунидарра. Учу жямяаьтлугъ проектарин руководителариз, гьацира Дагъустандин жара районариъра чпин вакилар дерккуз ич терефнаан кюмек тувуз гьязур вуча. Табасаран райондикан улхуруш, му лап уччвуб ва ужуб гележег хъайи, туризмдизра лап яркьу рякъяр ачмиш апIуз шулу район ву», – гъапнийи дугъу.

ЦIийи центр ачмиш апIбан кьяляхъ, «ЦIийи инсанар» партияйин региондин отделениейин кIулиъ айи Руслан Аьбдулхаликьовди партияйин вакил Марат Мутигуллинди, ва гьацира Ансар Рамазановдина Рашид Аьбдуллаевди жюрбежюр конкурсариъ гъалиб гъахьи жигьилар дипломар, чухсагъул мялум апIбан кагъзар тувбиинди лишанлу гъапIнийи.

Му серенжемдин дахилнаъди къайд дапIнайи йигъан сабсан гьядиса гъабхьну – Табасаран райондиъ «ЦIийи инсанар» кIуру Урусатдин партияйи райондин отделение ачмиш гъапIну. Дидин кIулиъ РССМ-дин Табасаран райондиъ айи ерли отделениейиз регьбервал туврайи Мягьямед Гьясратялиев дерккну. Партияйин региондин отделениейин кIулиъ айи Руслан Аьбдулхаликьовдин гафариинди, мицдар хъуркьувалар гъадагъуз Табасаран райондин жямяаьтлугъ проектар гьязур гъапIу бажаранлу касарин кIубанвали мумкинвал тувну.

Серенжемдин аьхириъ Мягьямед Гьясратялиевди Руслан Аьбдул-халикьовдиз пешкешди ханжал тувну ва хялариз Табасаран райондиъ айи уччвудар йишвариз экскурсия тешкил гъапIну.