Жиниб дар, хьадукран вазарилан башламиш дапIну, инсанарин яшайишдин думукьан пучIуди адру гьякьикьат цIийиди ачмиш гъабхьи коронавирусдин уьзрихъди аьлакьалу вуди кьабул гъапIу саб жерге ижми уьлчмйирин натижайиъ имбубсан гъагъи гъабхьну. Тялукь аьгьвалатнаъ гъазанмиш апIуз гъирагъдиз гъягъюз даршулайи гизаф ватанагьлийир, хизандин игьтияжарна тIалабар фици тямин апIуруш, ажугълу духьна.
БицIидар айи хизанариз гьюкуматдин терефнаан пулин кюмекар тувбан натижайиъ аьгьвалат хайлин пучIу апIузра мумкинвал тувну, вушра…
Дагъустанлуйир гьарсаб вахтна читин геренариъ сар-сариз кюмекназ гъюз гьязур вуйивалиинди фаркьлу ву. Му ражарира республикайиъ, аьхи-римжи вахтна арайиз дуфнайи аьгьвалат фикриз гъадабгъну, кьувватнаъ айи саб жерге рягьимлувалин фондари чпин ляхин гъизгъинди тешкил гъапIну. Гъахурайи серенжемарин натижайиъ йишвариин яшайишдин читин шартIариъ айи хизанариз кми-кмиди ипIру-убхъру сурсатарин кюмекар тувра.
Гьаци, улихьна йигъари Хив райондин Чювекк, Фурдагъ, Ургъа ва ВертIил гъулариан вуйи, йитимар айи, касибвал кайи саб жерге хизанариз итIру сурсатар жара гъапIну. Нубатнан ражари райондиз кюмек Дагъустандин дишагьлийирин союздин терефнаан гъафну.
Хив райондин дишагьлийирин советдин председатель Зумрия Сеидягьмедовайи къайд апIурайиганси, дурар, айи мумкинвалариз лигну, йишвариин кми-кмиди тялукь серенжемар гъахуз чалишмиш шула.
«Дугъриданра, гъябгъюрайи йис варидариз читинуб гъабхьну. Фагьумлу касарикан кми-кмиди ебхьруганси, уж’вал апIували анжагъ уж’вал арайиз хуру, сабур апIували дагълар дерккру. Арайиз гъафи аьгьвалатнаъ кюмекнан хил гьачIабкку гьарсар касдиз, хъа гъийин рягьимлувалин акция гъабхбакан кIул’инди гъулхиш, думу тешкил апIуз лазим вуйи кюмек туву РД-йин дишагьлийирин союздин кIулиъ айи Интизар Мамутаевайиз чухсагъул пуз ккундузуз. Вари уьзрарра, читинваларра гъябгъюрайи йисаъ гъитну, уж’валнан гамариинди цIийи йисаъ учIвбак умуд кивдихьа», – гъапну Зумрия Сеидягьмедовайи.
Аьлава апIурза, му йисан Хив райондин дарвал кайи хайлин хизанариз тялукь кюмекар «Инсан», «Марцци юкIв» рягьимлувалин фондарин кюмекниинди ва райондин жямяаьтлугъдин кьувватариинди тялукь акцийир гъахбан натижайиъра жара дапIна.
