Дагъустандиз коронавирус уьзриз аькси вуйи вакцинайин нубатнан партия дубхна. Гьаму ражари 1700 доза (улихьнаси 900 доза гъахнийи). Вакцина республикайин шагьрарин ва районарин арайиъ пай апIиди.

 

КIваина хурача, гуж дапIну, сар касдизра руб йивбанди дар, гьарсар касди жвуван хушниинди вакцинайин руб йивуз гъитди. Руб 18 йислан 60 йис’инакьан яшнаъ айи агьалйириз йивбанди ву. Прививка инсан яшамиш шулайи йишваъ поликлиникайиъ ясана Дагъустандин меркездиъ ерлешмиш дубхьнайи Республикайин сарикан тмунурикна тарагъру уьзрарин больницайиъ апIуз шулу.

Вакцинайин руб йивайиз, духтри гьарсар кас ахтармиш апIиди, гьацира M ва G иммуноглобулин айивалин гьякьнаанра. БицIир кади гъагъдиъ айи дишагьлийиз ва бицIир бабан никкдихъ хъайи дишагьлийириз вакцинайин руб йивуз хай шулдар. Гьацира бедендин температура за дубхьнайидаризра, ОРВИ уьзрин лишнар кайиризра руб йивувал къадагъа дапIна. Коронавирусдиз аькси руб йивайиз шубуд йигъ ккимиди ва думу йивбан кьяляхъ шубуд йигъан ички убхъузра ихтияр адар.

Регионариз хътапIурайи вакцинайин кьадар Урусатдин сагъламвал уьбхбан министерствойи ва Урусатдин промышленностдин алвер апIбан министерствойи улупура. Дагъустан Республикайин сагъламвал уьбхбан минис-терствойи федералин идарайиз хъанара вакцина жара апIбан гьякьнаан аьрза хъадапIна.

Вакцина «Спутник-V» –дюн’яйиъ сабпи ражари инсандин аденовирусдин бина-йиинди арайиз дубхнайи сабпи вакцина ву.

* * *

Роспотребнадзорин РД-йиъ айи управлениейин 17-пи декабриз вуйи улупбариинди, Дагъустандиъ коронавирус тарабгъувалин аьгьвалат гьамциб ву:
– коронавирусдиан аьзарлу духьнайидарин уьмуми кьадар 21278 кас (аьхиримжи йишван ва йигъан 152 кас аьзарлу гъахьну) ву;
– РД-йин сагъламвал уьбхбан министерствойин улупбариинди, 18368 кас (аьхиримжи йишван ва йигъан 66 кас) сагъ гъахьну;
– коронавирусдин уьзур ачмиш гъабхьи 1051 кас (аьхиримжи йишван ва йигъан 5 кас) гъийихну;
– республикайиъ 966402 касдин ахтармишар (тестар) гъухну;
– республикайиъ айи Роспотребнадзорин тIалаб-ниинди, 3114 кас хулариан удудучIвди дусна.