17-пи декабриъ Урусатдин Президент Владимир Путиндин гьар йисан гъабхру аьхю пресс-конференция кIули гъубшну.
Му йигъан РД-йин Правительствойин хуларин бицIи зализ республикайин министерствйирин ва идарйирин вакилариз, СМИ-йирин кIулиъ айидариз В.В.Путиндин пресс-конференцияйихъ сатIиди хъпехъуз теклиф гъапIнийи. Вахтназ вуди РД-йин Главайин вазифйир тамам апIурайи Сергей Меликов видеойин аьлакьайин къайдайиинди министерствйирин ва идарйирин вакиларихьна, муниципалин образованйирин главйирихьна, республикайин журналистарихьна илтIикIну ва ццийин пресс-конференцияйиъ уьлкейин гьарсар агьалийихьан чан суал тувуз шлуваликан къайд гъапIну. Эгер муниципалитетдин кIулиъ айирихьан агьалийин месэла гьял апIуз шулдарш, уьлкейин Президентдихьна илтIикIувалиъ харживал адар. Сергей Меликовди идар-йирин ва муниципалитетарин кIулиъ айидарикан уьлкейин жара регионарин агьалйири хъирчрайи суаларихъ ва уьлкейин Президентди туврайи жавабарихъ дикъатлуди хъпехъувал ккун гъапIнийи, фицики гьадму месэлйир ихь республикайизра кайидар хьуб мумкин ву. Думу муниципалитетариан хъархъас адабгъбан, агьалйир марцци штухъди тямин апIбан месэлйириин дийигънийи.
Владимир Путинди чан улхбан эвелиъ, гьарганси, гьаму йисанра арайиъ айи читинваларикан гъапну. Гьелбетда, дурар пандемияйихъди аьлакьалу ву, хъа пандемия вари дюн’яйиъ а.
Президентди гъапиганси, уьлкейиъ ВВП 3,6% ис гъабхьну, думу улупуб ЕС-дин уьлкйириътIан ва США-йиътIан цIибди ву. Промышленностдин гьясиллувал нафтлин кюмекниинди 3% за гъабхьну. Агьалйирин маважиб йисан аьхириз 1,5% за дубхьну ккунду. Хъа агьалйирин гъазанжар ис шула – думу бизнесдин гъазанжар ис хьувалихъди аьлакьалу ву. Урусатдин бюджетдин 70% нафтлина газди арайиз хури имдар.
Уьлкейин агьалйирин сагъламвал уьбхбан циркил коронавирусдин инфекцияйихьна гьязурди айиваликан вуйи суалариз жаваб туври, Владимир Путинди саб уьлкейинра сагъламвал уьбхбан циркил пандемияйихьна гьязурди адруваликан гъапнийи, хъа жара уьлкйирихь тевруш, ихь уьлкейи коронавирусдихъди тяди женг гъабхуз хъюгънийи. Дюн’яйиъ сабпиб вуди Урусатди инфекцияйиз аькси COVID-19 вакцина адабгъну. Дюн’яйин экспертарин улупбариинди, ихь вакцина заан ерийинуб ву.
Урусатдиъ яшамиш хьуз гъагъи дубхьнайиваликан гьерхган, уьлкейин Президентди къайд гъапIганси, Урусатдиъ 13,5% агьалйирин гъазанж яшамиш хьуз чарасуз лазим вуйи кьадартIан цIибди ву. 2030-пи йис улубкьайиз думу кьадар 6%-диина ис апIбанди ву.
Владимир Путинди 2021-пи йисан гьюкуматди бицIидар айи хизанариз туврайи кюмек артухъ апIбан мумкинвалар агурайиваликанра гъапну.
Магнитогорскдиан вуйи журналистди хъархъсарихъди аьлакьалу реформа али йишв’ин дийибгънайиваликан мялум гъапIиган, Владимир Путинди учв думу гафарихъди рази даруваликан гъапнийи. Зирзибил лазим вуйиси жара апIуз дубгъувал чарасуз ву, 2030-пи йис улубкьайиз варидари зирзибил жара апIуз дудубгъну ккунду.
Мектебариъ, вузариъ манзилнаъди дарсар кивбан гьякьнаан вуйи суалназ жаваб туври, Владимир Путинди 2021-пи йисан уьлкейин вари мектебариъ гьяракатнан интернет дубхьну ккуниваликанра гъапнийи.
Харижи уьлкйирихъди вуйи сяргьятар ачмиш апIбакан вуйи суалназ Владимир Путинди гьамциб жаваб тувну: «Духтрари ихтияр тувубси, сяргьятар ачмиш апIидихьа».
РФ-дин Правительствойиъ кадрйир дигиш апIбанди дар, фицики, Президентдин фикриинди, гьамусяаьт айи правительствойи мянфяаьтлуди ляхин апIура.
Къарабахдикан вуйи суаларра фикир тутрувди гъузундар. Владимир Путинди гъапиганси, гъярхьувалин бицIи-бицIи дюшюшар кми-кмиди арайиз гъюри гъахьну, аьхирки, дявдихъна гъафну. Москвайин метлеб ифи удубзувалин гъалмагъал дебккувал вуйи. Турцияйи Азербайжандин «гьякь вуйи ляхнин» тереф гъибисну. Анкарайи Бакуйикан чан аьтрафар кьяляхъ тувувал ккун апIурайи. Ифи удубзувал дебккунхьа, думу асас месэла ву, имбудар кьюбпи нубатнаъ тамам дапIну ккуни суалар ву. Гьамус региондиъ ислягьвал тяйин апIбан ляхин гъабхурахьа.
Владимир Путинди лихурайи пенсионерари уьлкейиз хайир хурайиваликан, хьуд йис улихьна хъадабтIнайи индексация, бюджетдин тяминвализ лигну, цIийи алапIруваликан, пенсийирин 6,4% индексация гъабхбанди вуйиваликан гъапнийи. Пресс-конференцияйин аьхириъ В. Путин бицIидар айи хизанарин месэлайихьна кьялахъ гъафнийи. Ургуд йис’инакьан яшар вуйи бицIидариз цIийи йисаз 5 агъзур манат тувди.
Владимир Путинди пресс-кон-ференцияйиъ дюн’яйиъ айи аьгьвалатнахъди аьлакьалу ва гьацира хайлин жара суаларизра жавабар тувну.
