Коронавирусдин уьзур тарабгъуз хъюгъхъан мина, Дагъустан Республикайиъ яшайишдиз чарасуз лазим вуйи ипIру-убхъру сурсатарин кьиматарин гьякьнаан РД-йин гъулан мяишатдин ва ипIру-убхъру сурсатарин министерствойина, РД-йиъ айи статистика гъабхру управлениейина Дагъустан республикайиъ айи УФАС-ди сатIиди гьар гьяфтайиъ ахтармишар гъахура.

 

Къайд апIуб лазим вуки, асас вуди кьиматар за шулайи шей’ар – тялукь фаслариътIан даршлу сурсатар ву. Мисалназ, мейвйир ва йимишар. Хъа гьаз-вуш жюрбежюр машкврар багахь хьуз хъюгъиган, республикайиъ ипIру-убхъру сурсатарин кьиматар за апIувал, аьдатси, ижмиди ихь уьмриъ убчIвна. Магьа, цIийи йис улубкьурайиган, магазнариъ ва базрариъ алверчйири йикк ва жара сурсатар багьади масу тувуз хъюгъра, яна ватанагьлийириз «цIийи йисандин пешкеш» апIура.

Гьаму аьгьвалат йислан-йисаз давам шулайивализ лигну, УФАС-ди республикайин базрариъ ва аьхю туканариъ ипIру-убхъру сурсатарин кьиматар за шулайивалин гьякьнаан инсанарихьан аьрз-йир кьабул апIру «убцру линия» ачмиш дапIна.

Гьюрматлу ватанагьлийир! Эгер учву базрариъ ясана туканариъ ипIру-убхъру сурсатарин кьиматар аьхиримжи йигъари за дапIнайивалин шагьидар вуш, 8 (8722) 51-72-08 нумрайиз зенг апIинай.

Зенгар гьар йигъан гвачIнин сяаьт 9-диан хябяхъдин сяаьт 6-диз кьабул апIура.
УФАС-дин пресс-гъуллугънаан учуз хабар тувганси, гюзчивал гъабхру му идарайи, агьалйири чпихьна хътаурайи аьрзйирин бинайиин дюзмиш гъапIу мялуматар гьар гьяфтайин гьякь-гьисабнаъ улупиди ва тахсиркрарин журум апIиди.