28-пи декабриъ Табасаран райондин администрацияйин заседанйир гъахру залиъ терроризмдиз аьксиди тешкил гъапIу конкурсдин гъалибчйир тебрик апIбан сережем кIули гъубшну.
Райондин главайин заместитель Заур Мусаевди, серенжем ачмиш апIури, конкурсдин тешкилатчйирикан, думу гъабхбан метлебнакан ктибтнийи.
«Му конкурс Табасаран райондин АТК-йи образованиейин управлениейихъди сатIиди, терроризмдиз аьксивал улупбан бадали, мектебариъ урхурайидарин арайиъ кIули гъубхну. Конкурсдиъ иштирак гъахьи урхурайидари, терроризмдикан вуйи чпин хиялар, фикрар шиклариъ ва думу шикларин кюмекниинди чиб терроризмдиз аькси вуйивал улупну»,
– къайд гъапIну Заур Мусаевди.
Дупну ккундуки, конкурс-диъ 40 мектебдиан 97 кас иштирак гъахьнийи. Гьадрари чпи 4-пи декабриъ Табасаран райондин культурайин Хулаъ гъабхьи конкурсдин серенжемдиъ 10 шикил гъядягъну ва дурарин авторар гъалибчйирди гьисаб гъапIнийи.
ВаритIан бицIи яшнан дестейиъ (1-4-пи классариъ урхурайидарин арайиъ) 1-пи йишв Табасаран райондин гимназияйиъ урхурайи – Уьсман Бабаевди (мялим Э. Шихмягьямедова), 2-пи йишв атIагну, ЧвултIарин кьялан мектебдин 3-пи классдиъ урхурайи Аьшагъиз Жамаловайи (мялим Х. Жамалова), 3-пи йишв – Рушвларин кьялан мектебдин 4-пи классдиъ урхурайи Мягьямед Сефербеговди (мялим Л. Сефербегова) гъадагъну.
Кьялан яшнан дестейиъ (5-9-пи классариъ урхурайидарин арайиъ) 1-пи йишван сагьиб Турфарин кьялан мектебдин 8-пи классдиъ урхурайи Аьли Гьюсейнов (мялим К. Гьюсейнов), 2-пи йишван сагьиб – Ягъдигъарин кьялан мектебдин 5-пи классдиъ урхурайи Камила Къурбанова (мялим С. Къурбанов) ва 3-пи йишван сагьиб – Пилгъарин кьялан мектебдин 8-пи классдиъ урхурайи Къисханум Ражабова (мялим Ш. Гьяжикъурбанов) гъахьну.
Сабсан 3-пи йишв Юсуф Базутаевдин ччвурнахъ хъайи ТIиварин кьялан мектебдин 6-пи классдиъ урхурайи Нигар Мягьямедовайиз тувну (мялим С. Мягьямедова).
Шубубпи дестейин (10-11-пи классариъ урхурайидарин арайиъ) 1-пи йишваз лайикьлу гъахьну ЦIурутIларин кьялан мектебдин 11-пи классдиъ урхурайи Альбина Абасова (мялим Э. Рашидов), 2-пи йишваз – АхьтIарин кьялан мектебдин 11-пи классдиъ урхурайи Къазимягьямед Гюлмягьямедов (мялим М. Гьяжиев) ва 3-пи йишваз – Хючнаарин 1-пи нумрайин лицейин 11-пи классдиъ урхурайи Муминат Аьзизова (мялим С.Ханягьмедов).
Вари гъалибчйир райондин администрацияйин терефнаан дипломарииндина пешкешариинди лишанлу гъапIну.
