2020-пи йисан 26-пи декабриъ Табасаран райондин Хючна гъулан «Табасаран райондин гимназия» МКОУ-йиъ бицIи классариз дарсар киврайи мялим Мафият Гьяжиаьлиева урусатдин телевидениейин 1-пи каналиан гъябгъюрайи «Поле чудес» передачайиъ иштирак гъахьну.
Му гьядисайикан газатдиз мялумат Гьюкуматдин табасаран драмтеатрин директор Аьлимурад Аьлимурадовди тувну. Мафият Гьяжиаьлиева передачайиз гьаъбан жягьтлувалра Аьлимураддин вуйи.
Дугъан гафариинди, Мафият Гьяжиаьлиева передачайиъ иштирак хьпан бадали, театри Табасаран райондин администрацияйихъди сатIиди саб бицIи программа гьязур гъапIнийи.
«Сабпи нубатнаъ Табасаран райондин глава Мягьямед Къурбановдиз, ихь ватанагьлийир Москавайиз гьаъбан вари харжар чаина гъадагъбаз, чухсагъул мялум апIуз ккундузуз.
Передача гьязур апIуз йигъар ккимиди, «Поле чудес» программайин музейиз пешкешди, гьадму капитал-шоуйин логотип кайи табасаран халачи гьязур гъапIнийи. Мидланра гъайри, учу Леонид Якубовичдиз Табасарандиан жара пешкешарра – нитIифна гапар гъухнийча, ва му передачайиъ Табасаран райондин культурайин отделин пишекар Оксана Ибрагьимовайи гьарсаб вахтна халкьдин мелзниин али ва ихь халкьдин гимнси гьисаб апIуз шлу Гьяжирамазан Аьликберовдин «Табасаран» мяълира гъапIну. Му мяъли ихь халкьдикан артухъдиси аьгъю хьпан бадали гъядябгъюб вуйич.
Табасаран театрин терефнаан «Поле чудесдин» музейдиз пешкешди билих, ханжал ва бицIи дуркьар хътаунча», – ктибтнийи Аьлимурад Аьлимурадовди.
Учв иштирак гъахьи передачайин гьякьнаан Мафият Гьяжиаьлиевайи гьамци гъапнийи:
«Леонид Якубович улихьнаси Дагъустандиз гъафиган ва чаз ихь миллетдикан ва дидин культурайикан лап маракьлу мялуматар гъеерхьиган, дурарикан ктибтузра кади, передачайиъ иштирак хьуз сар ихь ватанагьли гьауб ккун гъапIнийи. Гьадмуган му серенжем кIули гъабхуз тяйин дапIнайи касар узухьна илтIикIнийи. ИкибаштIан, лазим вуйи мялуматар вари гьязур дапIну, узу дина гъушунза. Телевидениейин 1-пи каналиан учу шлубкьан яркьуди ихь бицIи халкьдикан мялуматар тувунча. Ихь чIалнаъ падеж айивалиин, хили дубхнайи халачайин утканвалиин ва ихь халкьдин палтарик кайи накьишарин дерин мянйириин студияйиъ айи тамашичйир ва учв Якубович лап мюгьтал духьнайи.
Жаради чухсагъул пуз ккундузуз Мягьямед Сиражутдиновичдиз. Дугъу вари харжарра чав гъапIну ва учухъди Москвайизра гъафну. Гьацира передачайиъ иштирак хьуз учуз мумкинвал туву, чпин терефнаан пешкешарра хътау ва передачайиз гьязур хьуз кюмек гъапIу ихь театрин коллективдиз ва Аьлимурад Аьлимурадовдиз марцци кIваан чухсагъул вуйиз»,
– гъапнийи Мафиятди.
Мафият Гьяжиаьлиева иштирак гъахьи передача телевизориан 15-пи январиъ улупиди.
