Гьелбетда, жигьилвал – уьмрин варитIан уткан вахт ву. Амма, къайд апIувал лазим вуки, инсандин яшар гизаф дархьиди, гьаддин гъавриъ шулдар.
Ихь уьлкейиъси, респуб-ликайиъра жигьиларин аьхюну пай студентар ву. Гьар йисан вузариъ кьюрдун сессия ккудубкIру вахтна студентарин Йигъ къайд апIури шулу. Студентарин машариз гъилигиган, дурар гьарган бахтлу уьмрин эйсйирси рякъюру: гизаф дустар, алахьнайи уччву палтар, аьлхъюрайи машар…
Машнаъ шадвал ашра, гьарсар студентдин уьмриъ чазкьан читинваларра ади шулу. Гъи ухьу гьадму читинваларикан улхидихьа. Йиз сюгьбатчйир Дагъустандиан вуйи ва уьлкейин жюрбежюр вузариъ урхурайи студентар ву.
Эльвира, Саратовдин гьюкуматдин медицинайин университетдиъ урхурайи студент риш:
– Узу университетдин 6-пи курснаъ урхураза. Мектеб ужудар аьгъювалар ади ккудубкIбаз дилигну, документар уьлкейин хьуб вуздиз тувнийза. Гьадму вузарин арайиъ Дагъустандин медуниверситетра айи. Амма багъри республикайин вуздиз аьхю конкурс айивализ дилигну, узу кьабул гъапIундайи. Абйир-бабарихьан ярхла шагьриъ урхуз узуз читинди алабхъруваликан хабар айзуз. Вушра, духтирвалин кеспнахъ гизаф улар хъайиз. Гьаддиз узу кьабул гъапIу университетдиъ урхуз Саратов шагьриз гъушнийза. Мектебдиъ 11 йисан жвуван багъри мялимарихъди вердиш духьнайириз, медицинайин вуздиъ урхуз мукьан читин вуйиваликан хабар адайзуз. Гьаци вушра, юкIв хъивну, сабпи курснахъан мина дарсар урхуз хъюгъюнза. Медуниверситетариъ гьар йигъан 5-6 жут дарсар ади шулу, дурариз гьязур хьувализра гизаф вахт лазим ву. Бязи вахтари йишваъ ва йигъаъ 24 сяаьттIан адруваликан гьяйифар зигури шулза. НивкI апIуз вахт зат гьубкIри шулдар. Айи саб элгьет йигъан жвуван марццишнариз лигури ккунду. Гьамци, аквнан уьлке дярябкъди жигьил вахтра ккудубкIуз мумкин ву кIури, студентар аьлхъюри шулча.
Гьаму йисан коронавирусдин тIягъюн мялум дапIнайивализ дилигну, вари студентар манзилнаъди аьгъювалар гъадагъуз гьаънийи. Аьхю курсариъ айи ич гизаф студентар больницйириз ляхин апIуз «уьру зонйириз» гъушнийи. Урхбаъ фукьан читинвалар алахьурашра, духтирвалин пише инсанарин арайиъ гизаф гьюрмат айи пише ву. Гьаддиз узуз алахьу читинвалар гьич кIваиндикьан имдарзуз. Лап багарихьди урхуб ккудубкIидиза, хъа духтрин урхуб вари ярхи уьмриъ ккудудубкIруб вуйивалин гъавриъра аза.
Заур, Москвайин машинарин рякъярин университетдин студент:
– Узу Москвайиъ вуздиз кьабул гъапIиган, йиз шадвалин кьадар адайи. Хъа урхбан читинвалар алахьундаршра, абйир-бабари вазлиз хътапIу пул саб гьяфтайин арайиъ ккудубкIуйи. Стипендияйин кьадарра фукьан цIиб вуш, варидариз мялум ву. Пул хьтарди, гьарган гашди дарсариз гъягъруган, дарсарикан фикир апIуз шулдайи. Думу аьгьвалатнаан кIул адабгъуз дудубгъну ккундийи. Сабпи-кьюбпи курсариъ урхури имиди ужуб, пул кайи ляхин ккабхъри шулдар. Кми-кмиди йишвандин гъаравулвалин ляхин апIуз разивал тувбакк ккубкьру. Натижайиъ дарсариъ дуснайириз нивкI гъюри шулу, дарсарихьна вуйи маракьлувал дубгуру, сессия тувруган читинвалар алахьуру. Гьаддиз сабпи курснаъ имиди ляхин апIбахъ хъергну ккундар. Жуван жибдиз дилигну харжар апIури, асас вахт урхбаз тувиш, ужуди шулу. Аьхю курсариъ айи баяри читинвалариан кIул адабгъуз дубгъуру. Хъа, йиз фикриинди, читинвалар алалахьу касдиз уьмрин гъадри кади шулдар. Йиз студентвалин уьмриин узу шад вуза.
Арсен, Тамбовдин гьюкуматдин технический университетдиъ урхурайи студент:
– Узу, общежитиейиъ яшамиш шули, урхураза. Мялум дару шагьур, таниш дару баяр-шубар, мялимар, багахь хьтру абйир-бабар – сабпи курснан сабпи йигъар затра кIваълан гъягъюдар. Мектебдиъ урхури имиди Мягьячгъалайиъ ваъ, жара шагьриз урхуз гъягъюз кьаст дапIнайза. Дагъустандиъ спортдиинра машгъул вуйза. Гизаф жюрейин талитарин иштиракчи шулийза. Хъа мушваъ варибдихъан юкIв хъадабтIнайиз. Гьар ражари телефондиан дадайихъди гафар гъапIиган, хулаз хъадакну гъюз ккун шуйзуз. Узухъди яшамиш шулайи баяр – сар шубубпи, сарсан юкьубпи курснаъ айидар вуйи. Йиз кефйир адарди гъябкъюбси, дурари зарафатар апIури, аьлхъбар апIури шуйи. Гьамус йиз юлдшари урхуб ккудубкIну, узура шубубпи курснаъ урхураза.
Аьбдул, Мягьячгъалайиъ ДГУ-йиъ урхурайи студент:
– Узу гъулаъ дуланмиш шулайи касиб хизандиан вуза, мектеб ккудубкIну, ЕГЭ-йин натижйириинди ДГУ-йик урхуз кучIвунза. Гъулариан шагьрариз гъафи баяриз рягьятди алабхъурадар. Дарсар ужуди урхураза, вахт гьубкIри айиз, вахт ккабхъиган, пул гъазанмиш апIуз гъягъюрира шулза. Кьюб вазлик сабан гъулазра гъягъюраза. Вушра, шагьрариан вуйи студентар ужуди яшамиш шулайивал рябкъюразуз. Гизаф студентариз хусуси машинар, дурарихь багьалу телефонар хьа, дурари ужудар, ерийин палтар алахьури шулу. Гьацдарихьинди гъилигиган, жвувазра ккун шулу. Хъа дицдар фикрарихьан ярхлади гъузиш, ужу ву. Сессияйин вахтна багьалу машинариъ айидаритIан узу ужудар кьиматар гъадагъруган, юкIв шад шулу, мялимари узу дурариз чешнеди улупуру. Студент вушра, закурин йигъканра фикир апIураза. Университет ккудубкIиган узуз ужуб ляхин гъабхьнийиш, ккундийзуз.
Гьюрматлу студентар! Ичв Йигъ мубарак ибшри, заан хъуркьуваларин эйсйир ишричву. Читинвалар алахьну кIури, урхувал дипуз гьялак махьанай. Студентвалин йисар, гьелбетда, рягьятдар дар, хъа дурар гизафдарин фикриъ уьмрин кюкю дапIнайи вахтси гъузру.
