Закарья Амирбегов Табасаран райондиъ мяълийириин юкIв алидариз ужуб дих айи бажаранлу устадси аьгъя. Улихьна йигъари дугъу Хючна гъулаъ чан 60 йисандин юбилей къайд гъапIну.
Закарья Амирбегов 1961-пи йисан 23-пи январиъ Табасаран райондин ТIаттил гъулаъ бабкан гъахьну. Багъри гъулаъ кьялан мектеб ккудубкIну, дугъу 1979-1981-пи йисари Дагъустандин культурайинна мярифатнан учи-лищейиъ урхури гъахьну.
Зегьметнан рякъ 1982-пи йисан ЦIийи Лижва гъулан культурайин Хулаъ художествойин руководителди лихувалилан ккебгъну. Кьюд йисан Советарин армияйин жергйириъ гъуллугъ гъапIу жигьил Табасаран райондин культурайин Хулаъ аьхюнур методистди лихуз хъюгъну. Дугъу гъийин йигъазкьан гьадушваъ ляхин апIура. Дидланра савайи, Закарья Амирбегов Лижв’арин кьялан мектебдиъ музыкайин дарсар кивру мялимдира гъилихну. 2009-пи йисан дугъаз «Дагъустан Республикайин культурайин лайикьлу гъуллугъчи» кIуру ччвур тувну. Дагъустандин радиойин гъизилин фонднаъ Закарья Амирбеговди ктагъу 25 мяъли а. Думу жюрбежюр конкурсарин гъалибчира ву: 1980-пи йисан Кавказдин Минеральные Воды шагьриъ кIулиъ гъубшу «Студентарин хьадукар» кIуру конкурсдиъ 2-пи йишв, Расул Гьямзатовдин «Дагълу риш» кIуру мяъли дапIну, 1985-пи йисан «Юлдаш мяъли» кIуру конкурсдиъ 2-пи йишв гъибисну. Закарья Амирбеговдин намуслу зегьмет жюрбежюр пешкешариинди, дипломариинди, гьюрматнан грамотйириинди лишанлу дапIна.
Табасаран райондиъ аьхиримжи йисаризкьан Закарья Амирбеговдин иштирак’вал адру серенжем затра гъабхьундар. Дугъу гъидикIу шиърар ва тамам апIурайи мяълийир гьарсаб машквриз ва серенжемдиз тялукьдар ву. «Афгъанистандиз гъушу баяр» кIуру мяъли ва дидихьна мукьам ктабгъбаз лигну, дугъаз Афгъанистандиъ гъуллугъ гъапIу эскрарихъди сабси медаль тувну. Сасдар серенжемар му касди, жвуван мяълийир апIури, сарди кIули гъахури шулу. Думу чаз туву табшуругъ вахтниинди тамам апIрур, аькьюллу, сабурлу кас ву.
Юбилейин серенжем ачмиш апIури, Табасаран райондин культурайин управлениейин начальник Аьбдулвагьаб Аьбдуловди Закарья Мирзабегов Табасаран райондин глава Мягьямед Къурбановдин терефнаан юбилейихъди тебрик гъапIнийи ва дугъаз райондин главайин ччвурнахъан вуйи хилихъ хъапIру сяаьт ва грамота тувну. Чан терефнаан Аь. Аьбдуловди юбилейин эйсийиз хъана аьхю хъуркьувалар ва ярхи уьмур ккун гъапIнийи. Гьацира райондин культурайин Хулан гъуллугъчйири Закарья Амирбеговдиз пешкеш вуди халачи бахш гъапIну. Ляхнин гъарашугъари серенжемдиъ чпи Закарья Амирбеговдихъди сатIиди гъуху серенжемарикан, жюрбежюр маракьлу гьядисйирикан ктибтнийи ва дустраз бахш вуди мяълийирра гъапIнийи.
Гюрюшдин аьхириъ Закарья Амирбеговди чахъди сатIиди лихурайи ляхнин юлдшариз, учв гьясбикк дапIну серенжемдиз гъюбаз, аьхю чухсагъул гъапнийи ва чав ктабгъу «60 йис фу вухъа?» кIуру мяъли гъапIнийи.
