Аьхиримжи вахтна, мялум вуйиси, Дагъустандин аьтрафариин гъизгъинди коронавирусдин уьзриз аькси рубар йивбан серенжемар гъахура.

 

Му жигьатнаан Хив райондиъра саб жерге уьлчмйир кьабул дапIна.

– Ккудубшу гьяфтайиъ Хив ЦРБ-йиз РД-йин минздравдиан коронавирусдиз аькси 100 вакцина жара гъапIну. Му гьисабнаъ гьарсаб вакцинайин кьюбиб паярра улупна. Гьамусдиз райондиъ, руб йивайиз улихьна лазим вуйи ахтармишар духну, руб йивбаз аьксивал адру 24 ватандашди рубар йивна. Сабпи руб йивбахъан шубуб гьяфта гъубшиган, вакцинайин кьюбпи пайра йивиди.

Рубар гъивдарин сагъламвалин аьгьвалатнакан улхуруш, гьякьлуди кIурза, рубди тясир дапIну, думу муддат читинди ккадапIдар, аьрзйир кайидар адар. Сабпи йигъан бедендин температура цIибди за хьпан мумкинвал а, жараси вакцинайикан зарар адар.

Гъи жямяаьтлугъдин арайиъ му жигьатнаан гъизгъинди улхбар гъягъюра: гьам ужувлан, гьамсана инсанарик сикинсузвал кипбан саягънан. Тялукь ватандашарихьна илтIикIури, пуз ккундузуз: гьюрматлу ватанагьлийир, му серенжемар вари агьалйирин сагъламвал уьбхбан, ккудубшу йисан эвелариан ккебгъну, уьлкейиъ гъизгъинвал арайиз гъабхи коронавирусдин уьзриз рякъяр хъяркьбаз, аьзарлуйирин кьадар кам апIбаз сарф дапIнайидар ву. Мушваъ гьарсар касди ватандаш’валин тереф улупбан чарасузвал а.

Гьамусяаьт Хив ЦРБ-йиъ руб йивайиз улихьна инсандин сагъламвалин лазим вуйи ахтармишар гъахуз вари мумкинвалар а. Хъа къанунарин цIийиваларин бинайиинди, нагагь инсанди, чан сагъламвал мюгькамуб вуйивал субут дапIну, руб йивуз разивал улупбан аьрза абцIраш, му вакцина ахтармишар дурурхдира йивуз ихтияр а. Учу ич терефнаан райондин гьарсар ватандашдиз лазим вуйи кюмек туву гьязур вуча, – къайд гъапIну Хив ЦРБ-йин кIулин духтир Агъамягьмад Нурмягьямадовди.