Табасаран райондиъ бицIидарин багъариз гъадагъбан бадали, нубатнахъ 885 бицIир дийигъна. ВаритIан гизаф бицIидар СиртIич гъулаъ ккилигура – 118 кас, Хюрикк – 93 кас, Хянягъ – 74 кас, Къужник – 60 кас, ТIаттил – 57 кас ва Ярсаъ – 51 кас. Гьаму мялуматар улихьна йигъари Табасаран райондин администрацияйин актовый залиъ райондин образование-йин тешкилатарин пишекрарихъди гъабхьи совещаниейиъ райондин образованиейин управлениейиъ бицIидарин багъарихъди ляхин апIурайи пишекар Зилифат Аьбдуллаевайи (шиклиъ) загьир гъапIнийи.
УО-йин гъуллугъчийин гафариинди, гьамусяаьт Табасаран райондиъ 37 бицIидарин багъ ерлешмиш духьна, душвариъ 2037 бицIири аьгъювалар ва тербия гъадагъура. Дурарикан шубуд йислан ургуд йисазкьан вуйи бицIидарин кьадар 43% ву. Гьамдихъди сабси, цIийи йис ккебгъхъан мина ФуркIларин ва Гискарин бицIидарин багъариъ хьу-хьур бицIир кам гъахьну.
«Аьхиримжи вахтна райондиъ бицIидарин багъариз аьхю фикир тувуз хъюгъна. Ккудушу шубуд йисандин арайиъ 13 бицIидарин багъ дибдиан рас гъапIну. Душвариз мебель ва кухняйиз лазим вуйи авадлугъарра тувну. ЦIийи дестйириз (350 бицIир) мебель, столар, кусрйир, кроватар, шкафар ва гъюдли инвертарь масу гъадагъна. Гьацира вари бицIидарин багъар кухняйиз лазим вуйи авадлугъарин комплектарихъдира тямин дапIна: холодильникарихъди, газдин пичарихъди, морозильникарихъди, токдиинди йикк рябгъру авадлугъарихъди ва жара шей’арихъди.
Райондин 13 бицIидарин багъдиъ 4,5% ляхин апIру йишварра артухъ дапIна ва цIийиди 84 касдиз, гьадму гьисабнаан 35 мялимдиз ва 49 технический гъуллугъчийиз, лихру йишвар духьна.
Гъийин йигъаз 37 бицIидарин багъдикан анжагъ шубубдизтIан тялукь жюрейин дараматар адар, 3 багъ мектебарин дараматариъ ерлешмиш духьна, 8 – инсанарин хуларикк, миди вуйи 22 гьаци ккабалгнайи йишвар ву.
2020-пи йисан, цIийи программйириъ иштирак духьну, Шила ва Хянягъ гъулариъ айи бицIидарин багъар рас дапIну ккудукIну»,
– ктибтнийи Зилифат Аьбдуллаевайи.
Дугъан гафариинди, гьамусяаьт ЧIвурдафна Бургьанкентдиъ айи бицIидарин багъарра рас апIура. Къужникарин бицIидарин багъ рас дапIну ккудубкIну. Багарихьди хусуси хуларикк Акъа гъулаъра, 25 бицIириз йишв ади, Табасаран райондин гимназияйин филиал, СиртIич ва Ккувлигъ бицIидарин цIийи багъар ачмиш апIиди. Му серенжемарин натижайиъ 350 бицIириз йишвар шула.
Уьмуми гьисабариинди, райондин бицIидарин багъариъ 260 мялим лихура, дурарикан 85% хусуси метлеб айи курсар дурхнайидар ву.
Вари бицIидарин багъариз интернет дизигна, электрондин почтара а. БицIидарин багъариъ 53 компьютерра дивна, дурарикан бицIидарихъди ляхин апIрудар 18 ву.
