Гьаму йисан гьяждиз гъягъюз ккунидари коронавирусдиз аькси руб йивну ккунду. Дидин гьякьнаан Саудовский Аравия Паччагьлугъдин агьалйирин сагъламвал уьбхбан министерствойиан мялумат тувну.

 

Гьаци вуйиган, Меккайиъ ва Мединайиъ гирами йишвариз гъягъюз ккунидарихь COVID-19-диз аькси вакцинайин руб йивувал тасдикь апIурайи документ-справка хьади ккунду. Гьаддихъди сабси, менингитдиз ва гъатху цIийир гъюбан уьзрариз аькси прививкйир апIбан гьякьнаан вуйи вари халкьарин чешнейин шагьадатнама хьади хьувалин тIалабарра айиганси гъузра.

Гьяждиз гъюрудар кьабул апIру терефнаан туврайи мялуматариинди, Пачча-гьлугъдин гьюкмари гьяждин вахтна Меккайиъ ва Мединайиъ ляхин апIрудариз варидариз COVID-19-диз аькси рубар йивбанди ву.

Гьаму йисан ислам диндин гирами йишвариз гъягъру аьхю гьяж июль вазлин кьюбпи пайниин алабхъура. Гъубшу йисан вари дюн’яйиъ коронавирусдин тIягъюн мялум дапIнайивализ лигну, гьяждиз гъушдарин кьадар вари агъзур кастIан гъахьундар, гьадму кьадарнаканра 30% – ерли агьалйир, хъа 70% – Саудовский Аравияйиъ яшамиш шулайи жара уьлкйирин (8 кас Урусатдин) ватандашар вуйи.

Гъубшу йисан харижи уьлкйириъ яшамиш шулайи мусурмнар гьяждиз кьабул гъапIундайи.