Аьхиримжи вахтна гьам гьюкмин кIулиъ айидарин, гьамсана жямяаьтлугъ гъатарин арайиъ гъягъюрайи сюгьбатар коронавирусдиз аькси рубар йивбакан ву.
Райондин активдихьна илитIикIури, «Хивский район» МО-йин глава Ярмет Ярметовди му жигьатнаан зегьметнан коллективарин кIулиъ айидариз кьатI’и табшуругъар тувну. Гьадму гьисабнаан багахь вахтна коронавирусдиз аькси рубар йивбан чарасузваликан улхури, дугъу ккудубшу йисан хьадукраан мина вари уьлке гъизгъин дапIнайи коронавирусдин уьзрин тIягъюн анжагъ жямяаьтлугъдин асас гъатариз сабхилди рубар йивбииндитIан дебккуз даршлувал субут гъапIну.
— Уьзур тарарабгъуз йишвариин, гьелбетда, саб жерге уьлчмйир кьабул апIурахьа, вушра, гьелелиг вирус зяиф дубхьнадар. Хив ЦРБ-йин мялуматариз асас вуди, анжагъ саб ккудубшу гьяфтайиъ райондиъ тазади коронавирусдиан аьзарлу хьпан ургуб дюшюш ачмиш духьна. Дурарикан 5 касдин му уьзур лапра гъагъи дережайиъди ахмиш шула. Му улупбари ухьхьан тялукь гьяракатариинди тIягъюн дебккуз даршлуваликан кIура.
Улихьди руб йивбан рякъюъ хайлин тIалабарна улупбар айи, гъи, думу руб йивбан бадали, антитела аш мялум апIбан анализра тувуб герек имдар. Аьхиримжи шубуб вазлин муддатнаъ инсан вирусдиан аьзарлу духьнадарш, вакцина лазим ву.
Жиниб дар, коронавирус уьзриан варитIан аьхю хатIа 60 йистIан артухъ яш айи, сахарный диабетдиан ва саб жерге аьлава уьзрариан сагъламвал зяиф дубхьнайи касариз а. Гьаддиз сифте нубатнаъди дурарин сагъламвал уьбхбан гъаразнаъ хьувал важиблу ву: вакцинация гъабхури, сифте вуди гьадму гъатариз рубар йивуб лазим ву.
Республикайиъ арайиз дуфнайи аьгьвалат мюгькам апIбан метлебниинди, РД-йин Главайин тялукь указдин бинайиинди саб жерге уьлчмйир кьабул апIури, йис шула. Гьелелиг, аьхиримжи къарариз асас вуди, 65 йистIан артухъ яш айидариз ляхнариз удучIвуз ихтияртIан тувнадар.
Гъи, мисалназ, гизаф касари, айтIан гъуллугъарин вакилари маскйир алахьбан къайда чIур апIурайидарилан протоколар дикIбаз манигъ’вал улупури, аьрзйир апIура. Гьадму саб вахтна гьадму касар вакцинайин руб йивбазра аьксиди дийигъура. Хъа увуз хушниинди руб йивуз даккниган, хушниинди увлан тина жара кас аьзарлу апIуз шли ихтияр тувнавуз?!
Вакцинация, пуз ккундузуз, жямяаьтлугъ сагъламвал уьбхбаз сарф дапIнайиб ву. Дюз дару мялуматарин натижайиъ аьгьвалат гъизгъин апIуз ккунидарра гизаф а, амма мушваъ гьарсар касди, ватандаш’валин тереф дюбхну, вакцинация вахтниинди гъабхбаъ аьхю мяна а. Жямяаьтлугъдин асас гъатари му уьзрихьна иммунитет мюгькам гъапIгантIан, ухьхьан ухьуз аьдати улихьдин уьмрихьна хьтакуз хьибдар», – къайд гъапIну Ярмет Ярметовди.
Хив ЦРБ-йин кIулин духтрин заместитель Наида Пашаевайи субут апIурайиганси, 11-пи мартдиз вуйи улупбариинди, райондиъ 100 касди прививка дапIна, яна райондиз дубхьнайи вакцинйирин сабпи хара бегьемди ишлетмиш гъапIну. Багарихьди Мягьячгъалайиан коронавирусдиз аькси вакцинайин сабсан харайиз ккилигурача.
Уьмуми гьисабариинди, райондиъ аьгьвалат пучIу апIбан бадали, саки 6 агъзур касдикьан прививкйир апIуб лазим ву. Му жигьатнаан ляхин гьелелиг давам шула. ЦРБ-йиъ агьалйириз улупнайи рякъ’ан вари шартIар яратмиш дапIна. Хъа, 2022-пи йислан башламиш дапIну, му руб РФ-дин минздравдин прививкйирин тялукь календарин сиягьнаъди йивиди.
Шиклиъ: Хив райондин главайин заместительл М. Багъичевдиз COVID-19 аькси вакцинайин руб йивура.
