Гъубшу гьяфтайиъ Дагъустан Республикайин жигьиларин ляхнариз лигру министерствойиъ 2020-пи йисан гъапIу ляхнарин натижйириз бахш дапIнайи серенжем кIули гъубшну. Думу серенжемдиъ хайлин улихь-кIулихь хьайи касари ва гьацира жигьиларин ляхнариз лигру Федералин агентствойин кIулиъ айи Павел Абрамовди иштирак’вал гъапIну.
Серенжемдиъ жигьиларин ляхнариз лигру министерствойи 2020-пи йисандин арайиъ гъапIу ляхнарин натижйир йивбан кьяляхъ, мина дуфнайи Павел Абрамовди, хайлин йисари Ватандихьна ватанпервервалин гьиссар ади аргъаж шулайи наслар тербияламиш апIбаз лигну, ихь ватанагьли, РД-йин жигьиларин ляхнариз лигру министерствойин дахилнаъ айи жигьиларин гизаф гъуллугъар гьуркIру Центрин кIулиъ айирин заместитель Марат Рягьимовдиз Урусатдин Президент Владимир Путиндихьан вуйи Ватандин Аьхю дявдин Гъалибвалин 75 йис хьпахъди аьлакьалу грамота ва медаль тувну.
Къайд дапIну ккунду, аьхиримжи йисари Марат Рягьимовди республикайин саки вари муниципалитетарин живанарихъди, армияйиз гъахуз гьязур шулайи жигьиларихъди, дурар ватанпервервалихьна гьязур апIури, гизаф ляхин гъабхура. Мидланра гъайри, дугъу магьа жигьиларин ляхнариз лигру Федералин Агентствойин грантарин хъади-хъади кьюб конкурсдиъ гъалиб духьну, гьадму грантарин дакьатарихъ Табасаран райондиъ футболин майдан дивну ва футболиан турнирар гъахура.
«Табасарандин нурар» газатдин терефнаанра Марат Рягьимов му заан дережайин пешкеш тувбахъди тебрик апIури, дугъаз гележгдиъ хъанара артухъ хъуркьувалар хьуб ккун апIурача.
