Гьамусяаьт республикайиъ сач РД-йин Глава Владимир Васильевдин жягьтлувалиинди тешкил гъапIу «Чуру километрйир» акция давам шула. Марццишнахъдина экологияйихъди аьлакьалу вуйи гьаму серенжемдиъ республикайин вари муниципалитетари иштирак’вал апIура.
Табасаран райондиъ главади Мягьямед Къурбанов дерккхъан мина, райондин саки вари гъулариъ акцияйиз дахил шулайи субботникар гъягъюз хъюгъна. Дидланра савайи, райондиъ «субботникарин ваз» тасдикь дапIна.
Улихьнаси (22-пи мартдиъ) Хючна гъулаъ кIули гъубшу «Чуру километрйир» акцияйиъ, райондин глава Мягьямед Къурбанов, РД-йин парламентдин депутатар Алавудин Мирзабалаев ваСеф ер Аьлиев, РД-йин юстицияйин министр Къазимягьямед Сефикъурбанов, РД-йин милли политикайин министр Энрик Муслимов, РД-йиъ айи ярквран мяишатдин председателин заместитель Велибег Ферзуллаев ва хайлин жарадарра иштирак духьну, мектебарин багарихь, паркдиъ, Кьалухъ Мирзайин ччвурнахъ хъайи спорткомплексдиъ 1000-тIан артухъ гъелемар кивну. Му гьяракат давам апIури, 26-пи мартдиъ Хючна гъулан администрацияра райондин ММЦ-йихъди сатIиди «Чуру километрйир» акцияйиъ иштирак гъабхьну ва райондин центрин кючйириъ марццишин апIбан ва гъулан паркдиъ гьарар кивбан ляхнар кIули гъухну. Гьаци, 29-пи мартдиъ акцияйиъ иштирак хьпан эстафета райондин больницайи кьабул гъапIну. Хъа 31-пи мартдиъ акцияйиъ Табасаран райондин бицIидаринна живанарин спортдин 1-пи нумрайин мектеб (ДЮСШ №1) иштирак гъабхьну. Дурарира чпин тешкилатдин гьяятар марцц гъапIну ва 50-рихьнакьан гъелемар кивну.
Зиихъ къайд гъапIганси, «Чуру километрйир» акцияйиъ вари муниципалитетар иштирак шула. 26-пи мартдиъ Дербент шагьрин глава Абакар Хизриевра кIулиъ ади, акцияйиз бахш дапIнайи субботник гъабхьну ва душваъра марццишнан ляхнар тамам гъапIну, гьарарин гъелемар кивну.
Дагъустандин Огни шагьриъра акция гьяракатнаъ а. Улихьна йигъари Дагъ.Огнийиъ, шагьрин глава Зейдуллагь Гьяшимов кIулиъ ади, администрацияйиз дахил шулайи вари гъурулушарин пишекрар акцияйиъ иштирак гъахьну ва шагьрин паркариъ 400-тIан артухъ гъелемар кивну.
Гьелелиг «Чуру километрйир» акция давам шули ими.
