5-пи апрелиъ РД-йин военный комиссар Дайтбег Мустафаев, хьадукран призыв ккебгънайивалихъди аьлакьалу вуди, республикайин СМИ-йин журналистарихъди гюрюшмиш гъахьну. Дугъу 2020-пи йисандин чвлин призывдин натижйириканра мялуматар тувнийи.
«Урусатдин жара субъектариъси, Дагъустандиъра апрелин 1-пи йигълан мина жигьилариз дявдин гъуллугъназ дих апIбахъди аьлакьалу серенжемар ккергъна. Коронавирусдин тIягъюн мялум дапIнайивализ дилигди, 2020-пи йисан Дагъустандиан дявдин гъуллугъназ 8 агъзур ватандаш гьауз гъабхьну. Гъубшу йисан чвлин призывдин вахтна республикайин саки вари шагьрариан ва районариан 3,5 агъзуртIан артухъ баяр армияйин жерг-йириъ гъуллугъ апIуз гъушну. Армияйиз гъушу баярин 70%-тIан артухъ заан ва кьялан пишекарвалин образование айидар вуйи. Гъубшу йисан призыв, уьлкейиъ коронавирусдин уьзур тарабгънайивализ лигну, республикайин призывникар уч шлу пунктназ гъафи гьарсар жигьили COVID-19 инфекция каш аьгъю апIру тест туври гъахьну. Военный комиссариатдин гъуллугъчйирира кьюб гьяфтайик саб ражари тестар туврайи. Гъубху ляхнин натижайиъ чпик коронавирусдин инфекция кайивал мялум гъабхьи 20 кас ашкар гъахьнийи. Гьамциб ляхин гъабхбан натижайиъ коронавирусдиан аьзарлу духьнайи гьич сар каскьан Яракьлу кьувватарин жергйириз гъушундар. Дявдин гъуллугъ гъабхру йишв’ина хъуркьиган, жигьил эскрар кьюб гьяфтайиъ карантиндиъ гъахьну. Апрелин 1-пи йигълан мина РД-йин военный комиссариатариъ гьаму жюрейиинди ляхин гъабхура.
Военный комиссариатдин саки вари гъуллугъчйири чпин хушниинди COVID-19 инфекцияйиз аькси рубар гъивну.
Вахтназ вуди Дагъустан Республикайин Главайин вазифйир тамам апIурайи Сергей Меликовдин табшуругъниинди, 1-пи апрелихъан мина муниципалин 52 ва республикайин саб призывдин комиссйир тешкил дапIна. Лазим вуйи вари алатар (маскйир, элжгар, термометрар, кварцдин лампйир) бегьемди а»,
– ктибтнийи Дайтбег Мустафаевди.
Военкомди туву мялуматариинди, гъубшу йисан республикайин военный комиссариатди контрактдиинди гъуллугъ апIуз 1500-тIан артухъ ватандашар гьаъну. Аьхиримжи йисари армияйиъ гъуллугъ апIбан саб тафавутлувал а: заан ва кьялан пишекарвалин образование айи ватандашариз призывдиинди сад йисаз ваъ, хъа контрактдиинди дявдин гъуллугъназ гъягъюз ихтияр тувра. Эгер призывдиинди сад йисан гъуллугъ апIураш, контрактдиинди 3 йисан гъуллугъ дапIну ккунду.
Журналистари Дайтбег Мустафаевдихьан Дагъустан-дин баяри чпи гьаънайи йишвариъ фици гъуллугъ гъабхураш, военкомдин адресназ кагъзар гъюраш, суалар тувнийи.
«Гъийин йигъаз армияйиз душнайи 20 ватандашдиз аьксиди уголовный делойир гъитIирккна. Гьаци вушра, улихьна йисарин улупбарихь тевиган, ихь баярихъди аьлакьалу чIуру дюшюшар цIиб духьна. Гъубшу йисан ихь элугълийири гъуллугъ апIурайи военный частариан командирарихьан 40-тIан артухъ тярифнан кагъзар гъафну»,
– жаваб тувнийи республикайин военкомди.
