2021-пи йисан 2-пи апрелиан 6-пи апрелиз Мягьячгъала шагьриъ Кьягьялвалин ордендин сагьиб, РГВК «Дагъустан» ачмиш гъапIу Гьарун Къурбановдин рюгьяриз бахш дапIнайи вари Урусатдин шашкйирин турнир кIули гъубшну.
Му турнириз дюн’яйин варитIан ужударстар спорт-сменарин цIарнаъ айи, Урусатдин 17 региондиан шашкйир уйнамиш апIру 39 устадар уч гъахьнийи. Иштиракчйирин арайиъ 5 гроссмейстерар, 1 – шашк-йириан дюн’яйин устад, 16 – шашкйириан спортдин устадар ва 17 – спортдин устадвализ кандидатар айи.
Талитар швейцарияйин къайдайиинди 9 туриъди кIули гъухнийи. Турнириъ кIакIначйирси гьисаб апIурайидар шашкйириан швнуб-саб ражну дюн’яйин чемпионар гъахьи Крымдиан вуйи Сергей Белошеев, Самарайиан вуйи Олег Дашков, Челябинскдиан вуйи Жанна Бупеева, Ленинграддин областдиан вуйи Мажид Саршаев вуйи. Талитарин аьхириъ, 9 очкойикан 8 очко гъазанмиш дапIну, сабпи йишв Самарайиан вуйи Олег Дашковди гъибисну, кьюбпи йишв – 7,5 очко гъадагъу Крымдиан вуйи Сергей Белошеевди, шубубпи йи-шван сагьиб – 6,5 очко гъадагъу Ленинграддин областдиан вуйи Мажид Саршаев гъахьну, юкьубпи йишв, 6 очко гъазанмиш дапIну, Сибирин федералин округдиъ 8 ражну чемпион гъахьи Игорь Павловди гъадабгъну. 5-пи – 7-пи йишвар гроссмейстерар Сергей Александринди, дюн’яйин 2 ражну чемпион гъахьи Жанна Бупеевайи ва Дагъустан Республикайиан вуйи Исмяил Исмяиловди чпин арайиъ пай гъапIну – дурари гьарури 5,5 очко гъазанмиш гъапIнийи. Гьаци, Исмяил Исмяиловди 4-пи ражну Урусатдин спортдин устад кIуру ччвур тасдикь гъапIну. Табасарандиан вуйи шашкйир апIруриз му аьхю хъуркьувал ву. Гьамусяаьт Дагъустандиъ шашкйириан спортдин хусуси устадар адар. Дупну ккундуки, Исмяил Исмяиловди Урусатдин ва Дагъустандин шашкйирин спорт улихь гъябгъбак чан аьхю пай кивну. Гьаму касдин зегьметниинди Урусатдиъ Дагъустан шашкйирин спортдин маканси гьисаб апIура.
Турнирин гъалибчйир дипломариинди, медалариинди, кубокариинди ва кьиматлу пешкешариинди лишанлу гъапIнийи. Шашкйир апIру, Дагъустандиан вуйи шубур спортсмендиз Табасаран райондин глава Мягьямед Къурбановдира пешкешар тувну.
Турнирин кьяляхъ Дагъус-тандин физкультурайинна спортдин министр Сажид Сажидовди, Урусатдин шашкйирин федерацияйин вице-президент Олег Дашковра кIулиъ ади, шашкйириан турнириъ гъалиб гъахьи спортсменар министерствойиъ кьабул гъапIну. Думу гюрюшдиъ Дагъустандиъ шашкйирин спорт артмиш апIбакан сюгьбатар гъухнийи. Дагъустан Республикайин шашкйирин федерацияйин вице-президент Исмяил Исмяиловдиз республикайиъ шашкйирин спорт артмиш апIбан уьлчмйир кьабул апIуз табшурмиш гъапIну.
Шиклиъ: турнирин гъалибчйир РД-йин физкультурайин ва спортдин министрихь. Гагвлахъан шубурпир – Исмяил Исмяилов.
