14-пи апрелиъ Урусатдин премьер-министр Михаил Мишустин Дагъустандиз гъафну. Думу кIулиъ айи делегацияйин дахилнаъ РФ-дин сагъламвал уьбхбан министр Михаил Мурашко, Ростуризмдин кIулиъ айи Зарина Догузова, Ярхла ригъ гьудубчIвру терефнан федералин округдиъ РФ-дин Президентдин вари ихтиярар айи вакил – правительствойин председателин заместитель Юрий Трутнев, РФ-дин табиаьтдин девлетарин ва экологияйин министр Александр Козлов, РФ-дин экономикайин артмиш’валин министр Максим Решетников, РФ-дин тикилишчивалин ва ЖКХ-йин министр Ирек Файзуллин айи.
Мягьячгъалайин аэропортдиъ дурар СКФО-йиъ РФ-дин Президентдин вари ихтиярар айи вакил Юрий Чайкайи, РФ-дин правительствойин председателин заместитель Юрий Трутневди ва вахтназ вуди Дагъустандин Главайин вазифйир тамам апIурайи Сергей Меликовди кьабул гъапIнийи.
Михаил Мишустинди Дагъустандиъ гъабхру чан ляхин Дербентдиз гъягъбалан, душваъ шагьрин кьялан больницайиъ айи аьгьвалатнахъди таниш хьувалилан ккебгъну. Гъи 586 аьзарлу дахъру йишвар айи Дербент шагьрин кьялан больницайи 400 агъзур касдиз медицинайин кюмек тувра.
РФ-дин премьер-министри больницайиз медицинайин авадлугъар ва медицинайин тяди кюмек тувру 16 машин жара апIуз къарар адабгъну. «Больница цIийи авадлугъарихъди тямин гъапIиш, ерли агьалйир, медицинайин заан ерийин кюмек абгури, жара йишвариз гъягъидар. Ерли агьалйирихьан чпи яшамиш шулайи региондиъ сагъламвал къайдайиз хуз хьибди», – гъапну министрарин кабинетдин кIулиъ айири.
Дербентдиъ Михаил Мишустин «Нарын-гъала» гъалайиина гъушну ва шагьур артмиш апIбан месэлйирихъди таниш гъахьну. Шагьрин кIулиъ айидарин гафариинди, Дербент артмиш апIбан план уьмриз кечирмиш апIбан бадали, 330 миллиард манат лазим хьибди.
* * *
РФ-дин премьер-министр Михаил Мишустин ва Сергей Меликов Мягьячгъалайин аэропортдин тикмиш апIурайи цIийи терминализ лигузра гъушну. Тикилишчивалин ляхнар ккудукIура, терминал лап багарихьди ишлетмиш’вализ тувди. Самолетари тIирхуз гьяракат гъадабгъру рякъюн чIул къайдайиз хуз ими. Премьери туризм артмиш апIбан цирклиъ цIийи терминал либхуз хъюбгъювалин важиблуваликан гъапнийи: «Дагъустан – лап уткан регион ву. Мицисдар йишвариз гъюру туристариз самолетарин ужудар рякъяр лазим ву».
Терминал ишлетмиш’вализ тувган, Мягьячгъалайин аэропортдиан мина-тина гъягъру пассажирарин кьадар йисандин арайиъ 2,5 миллиондиинакьан артухъ хьибди. Дицисдар мумкинвалари республикайин артмиш’вализ кюмек тувди.
* * *
РФ-дин премьер-министр ва дугъахъди дуфнайи делегация Каспийск шагьризра гъушну. Дурар Каспийскдиъ диврайи цIийи микрора-йондиз, душваъ тикмиш апIуз планламиш дапIнайи бицIидарин багъариз, мектебариз гъилигну. Гьадму милли кьюб проектдиз федералин бюджетдиан 8 миллиард манат жара дапIна, региондианра кюмек тувра. Михаил Мишустинди улихь дивнайи месэлйир вахтниинди тамам апIбак чав умуд киврайиваликан гъапну.
* * *
Вахтназ вуди Дагъустандин Главайин вазифйир тамам апIурайи Сергей Меликовди къайд гъапIганси, гъи федералин гьюкмин ляхин кIулиз адабгъру органариан вуйи гъарашугъарихъди гьял гъапIу асас месэла – цци 3-пи мартдиъ Федерацияйин Советдин заседаниейиъ гъитIиркку, багахь йисари уьмриз кечирмиш дапIну ккуни Дагъустандин яшайишдинна экономикайин артмиш’валин теклифар вуйи.
«Урусатдин правительствойин Председатель сабпи ражари Дербентдиз гъафнийи, шагьрин тарихниин, дидин артмиш’валин гележегдиин гьяйран гъахьнийи. Учу яшайишдин швнуб-саб объектдизра гъилигунча. Дербент шагьрин кьялан больницайиъ гьял дапIну ккуни гизаф месэлйир а. Хьадан вахтна больницайиъ туристаризра медицинайин кюмек тувбан месэлйир гьисабназ гъадагъну, Дербентдин ЦГБ-йиз цIийи авадлугъар масу гъадабгъбан бадали, пулин дакьатар жара апIбан гьякьнаан къарар кьабул гъапIнийи.
Вахтниинди ишлетмиш’вализ тувуз шули адрувалин месэлйир гъитIирккнийи, гьамусяаьт тикмиш апIурайи бицIидарин багъаризра гъилигунча. «Образование» ва «Демография» милли проектар уьмриз кечирмиш апIурайи РФ-дин оборонайин министерствойиан вуйи гъарашугъари графикдихъди сабси ляхин гъабхура. БицIидарин багъар вахтниинди ишлетмиш’вализ тувди, ва 1-пи сентябриъ бицIидар кьабул апIиди»,
– гъапну региондин кIулиъ айири.
Урусатдин министрарин кабинетдин кIулиъ айирихъди гьял гъапIу месэлйирикан саб – аэропорт яркьу апIувал вуйи. Сергей Меликовдин гафариинди, гьяждиз гъягъру вахт багахь шулайивалихъди аьлакьалу вуди, думу месэла гьамусяаьт гьял апIувал важиблу ву.
«Ихь республикайин аьтрафариин яшамиш шулайидаризси, вари Кафари Кавказдиан ва Урусатдин жара регионариан гьяждиз гъягърудариз мумкинвал тувувал – Дагъустандиз важиблу месэла ву. Гьаддиз ухьуз гьамусяаьт тикмиш дапIну ккудубкIурайи вари халкьарин терминал чарасуз лазим ву. Тувнайи гаф тамам дапIну, гьаму йисан июлин вазлиъ думу ачмиш дапIну ккунду», – гъапну республикайин кIулиъ айири.
Мидланра савайи, Дагъустандиз федералин кюмек дарди гьял апIуз читинди вуйи жара месэлйирра гъитIирккнийи. «Арайиз адагъу месэлйирин аьхюну пай фикриз гъадагъну, дурарин гьякьнаанра табшуругъар тувди. 2022-пи ва гележегдин йисариз бюджет планламиш апIруган, федералин центри Дагъустандин артмиш’вализ тувру кюмекра гьисабназ гъадабгъуз хьибди»,
– аьлава гъапIну Сергей Меликовди.
