Казандиъ 11-пи майдиъ пашман дюшюш хьувалихъди аьлакьалу вуди, 12-пи май Татарстандиъ пашманвалин кIару йигъси мялум гъапIну.
Майдин 11-пи йигъан гвачIнинган сяаьт йицIубдиз 28 дакьикьа дилибхнайиган, Казань шагьрин Жаудат Файзийин кючейиъ айи 175-пи нумрайин мектебдиъ мялум дару, кIару палат алабхьнайи яракь хьайи кас архьну, мектебдин коридорикк яракьдиан йивуз хъюгъну ва тIубкIру сяняаьт гъутIубкIну. Гьаму вахтна мектебдин гъаравул хатIайикан хабар тувру кнопкайиз илзигуз хъуркьну. Мектебдин багхьан тина гъягъюрайи сар касдиз тIубкIувалин сес гъеебхьган, 112 нумриз зенг гъапIну. 3,5 дакьикьайилан Росгвардияйин десте йишв’ина хъубкьну, дурарин кьяляхъди ППС-дин гъуллугъчйирра. Хъуркьу полицейскйири яракьдиан йивурайи жигьил дишла гъидисну, амма думугандиз «вягьши» 8-пи классдиъ архьну, душваъ айи бицIидар йивну йихуз хъуркьну.
Туврайи аьхиримжи мялуматариинди, думу пашман дюшюшдиъ кьюр мялим ва 8 урхурайидар гъийихну, дурарикан кьюр бицIир шубубпи мертебайиан урсган гъийихдар ву; 21 кас, зийнар духьну, больницайиъ ккаъна, дурарин асас пай мектебдиъ урхурайидар ву.
Мектебдиъ архьну йивбар гъапIу 19 йисаъ айи Ильназ Галявиев гъидисну. Дугъу гьадму мектеб 4 йис улихьна ккудубкIну. Дугъу йивбар гъапIу тюфенг гьадгъан ликрихъ регистрация дапIнайиб ву. Улихьна йигъан Галявиевди чан телеграм-каналиъ «Бог» кIуру ччвурнаккди швнуб-саб инсафсуз постар гъидикIну. Татарстандин МВД-йин улупбариинди, Галявиевди гьаму вягьшивалин дюшюш сарди кIулиз адабгъну.
Казандин мектебдиъ гъи-йихдарихъан вари уьлкейи дерд-суза зигура, гьадрарихъди сабси ич редакцияйин коллективдира. Думу кьадар инсафсузвалиинди саб жюрейинра тахсир ктру набалугъ бицIидариина яракь за апIуз гъабхьи касдиз фуж кIуруш, ихь чIалнаъ гаф гъибихъундарчуз. Сабишв’инди вари вягьши гьяйванатари инсанариз думукьан зиян дарапIур. Дугъри гафар ву, варитIан чIуру гьяйванат – кьюб ликриинди либцру, инсандин суфат гъяйиб ву. Гьацир къанажагъсуз инсандихьан варитIан ихтиятди гъузну ккунду.
Йивну гъийиху бицIидарин ва мялимдин абйир-бабариз, багахьлуйириз ич дерин пашманвал мялум апIури, дурариз башсагълугъвал ккун апIурача, гъати дерд гьял апIуз Аллагьди сабур тувричвуз. Хъа зийнар духьнайидариз, ухди сагъ духьну, чпин хизанариз сагъди кьяляхъ гъювал ккун апIурача.
Газатдин редакцияйин коллектив
