«Саб вуйи Урусат» партияйин Дагъустандин отделениейин сайтдиъ сесер тувбаан гьамусдиз гьисаб гъапIу сесерин натижйир чап дапIна.

 

«Саб вуйи Урусат» партияйин вахт ккимиди онлайн къайдайиинди сесер тувувал 24-30-пи майдиъ, хъа сечкийин участокариина дуфну сесер тувувалин ляхин – 30 майдиъ кIули гъубшну. Партияйин региондин ляхин кIулиз адабгъру комитетдиан туврайи мялуматариинди, гьамусяаьт сечкичйирин сесер гьисаб апIувал давам шули ими.

Вахт ккимиди сесер тувбан натижйириинди, Дагъустан Республикайин терефнаан Государствойин Думайиз вуйи кандидатарикан варитIан улихь Нурбагьанд Нурбагьандов (Сергокъалайин вуйи Урусатдин Игит Мягьямед Нурбагьандовдин ччвурнахъ хъайи кьялан мектебдин директор, 48603 сес), Мягьямед Гьяжиев (Государствойин Думайин депутат, жямяаьтлугъдин ва диндин месэлйириз лигру Комитетдин член, 42541 сес), Сайгидпаша Умаханов (Дагъустан Республикайин Главайин теклифчи, 40597 сес), Хизри Абакаров (Дагъустан Республикайин Госсекретарь, 39819 сес), Артем Бичаев (ОНФ-дин региондин ляхнин исполкомдин кIулиъ айирин заместитель, 27903 сес), Султан Гьямзаев («Дурубхъру Урусат» федералин проектдин кIулиъ айир, 27371 сес), Мамед Абасов («Монолитхолдинг» ООО-йин правлениейин председателин заместитель, 26945 сес), КъубатIай Масуев (ДГМУ-йин поликлиникайин терапияйин кафедрайин заведующий, 19617 сес) ва Елена Павлюченко (ДГТУ-йин «Мялуматарин технологйир ва телекоммуникацйир» НИИ-йин директор, 13562 сес) хьа.

Дагъустандин саб мандат айи Кафари сечкийин округдиъ сесерин аьхю тафавутвал ади Росгвардияйин Кафари Кавказдин округдин кьушмарин командующийдин заместитель Аьбдулгьяким Гьяжиев (81330 сес) улихь гьудучIвну.

Саб мандат айи Кьялан округдиъ варитIан гизаф сесер Госдумайин депутатар Мурад Гьяжиевдихъанди (44128 сес) ва Аьбдулгьямид Эмир-гьямзаевдихъанди (30918 сес) тувну.

Саб мандат айи Кьибла округдиъ варитIан гизаф сесер РФ-дин Президентдин багахь Дагъустандин вари ихтиярар айи вакил Жамаладин Гьясановдихъанди тувну.