Табасаран райондин Хючна гъул’ан Халагъна гъябгъру рякъюн Угъул дерейиъ нир’ин гъяд иливували ва гьадлин тина рякъ апIували Халагъна, Бухьнагъна, Гумиз, Жвуллиз, Афназ вуйи рякъюн манзил саки 7 километриинакьан жикъи апIуру. Дидкан улхбар гъахури, гизаф йисар вуйи, хъа рякъ апIуз гьаму йисан хъюгъну.

Майдин вазлиъ Халагъ гъул’ан вуйи Ватандин Аьхю дявдин иштиракчи Гьясан Ражабов Гъалибвалин Йигъахъди тебрик апIуз Дагъустан Республикайин Правительствойин председателин сарпи заместитель Нюсрет Уьмаров кIулиъ ади гъубшу делегацияйикан ветеранди Хючна-Халагъ рякъюн Угъул дерейиъ нир’ин гъяд иливуз кюмек апIувал ккун гъапIнийи. Вахтназ вуди Дагъустандин Главайин вазифйир тамам апIурайи Сергей Меликовди му ляхин тамам апIуз мумкинвалар аш аьгъю апIуз асас гъуллугъариз табшуругъар тувнийи.

Хъа Угъул дерейиан зина рякъ апIури, гьамусяаьт гьяракат а. Му рякъ апIуз кюмек дарапIу кас думу терефнаъ айи гъулариъ, гьадму гъулариан удучIвну душну, шагьрариъ яшамиш шулайидарин арайиъ гьичра имдаршул. Гьарсар касдин му рякъ апIуз кюмек вуди туву пул садакьа ибшри.

Гьаму улихьна йигъари багъри Халагъ гъулаз Испанияйиъ яшамиш шулайи дилаварчи Назим Рамазанов гъафнийи. Дугъу, гъулан жямяаьтдин улихь хьайи касариз, имамдиз теклиф дапIну, гюрюш гъубхну. Гьадму гюрюшдиъ Назим Гьямзаевичди рякъ апIуз кюмек вуди саб миллион манат тувну. Думу кьадар кюмек гьеле гъийин йигъаз сар касдин терефнаанра дуфнадайи. Гележегдиъ лазим гъабхьиш, Назим Рамазановди учв хъана кюмекнан хил гьачIабккуз гьязур вуйиваликан гъапну.

Назим Рамазановдиз Табасаран райондин Халагъ терефнаъ айи гъуларин жямяаьтди аьхю чухсагъул мялум апIура.

Гъит ихь арайиъ гьамцдар, кIваъ рягьим айи инсанар хъана артухъ ишри.