Мектебариъ 11-пи классариъ урхурайидари туврайи имтигьнар аьхирихъна дуфна. Уьмрин цIийи рякъюъ учIврайидар мектебдиз баркаллагь мялум апIбан шадвалин серенжемдиз – вечериз ккилигура.
Амма гъубшу йисанси, гьаму йисанра думу вечерар фици кIули гъягъюруш, вахт ккимиди пуз шуладар. Вари дюн’яйиъси, ихь республикайиъра коронавирусдин уьзри чан агъавал давам апIура. Урусатдин гизаф шагьрариъ уьзрихьан уьрхру къайдйир мюгькам дапIна. Ихь республикайиъра коронавирус тарабгъувал яваш апIбан къайдйир уьрхюра. Гьюкмари, духтрари инсанарикан вакцинайин рубар йивувал ккун апIура. Амма ихь республика рубар йивувалин сиягьнаъ гизаф регионарин кьяляхъ гъубзра.
КIваина хурача, мектебариъ выпускной вечерар улихьна йисариси 25-26-27-пи июндиъ кIули гъягъиди. Мектебарин администрацйири йигъ дивна, вечер наан гъабхуруш, выпускникарихьна фицдар тIалабар дивруш, аьгъю апIиди.
Жибгьилвал – уьмрин уткан вахт ву. Мектеб ккудубкIурайи саки вари выпускникари вечер наан гъабхуруш, вахт ккимиди ресторанариъ йишвар дидисна, шубари уччвудар ккурттар гьязур дапIна. Гьелбетда, дурариз чпин мектебдин юлдшарихъди вуйи серенжем вари уьмриъ кIваинди гъубзруганси кIули гъабхуз ккунди а.
– Вари учуз ккуниганси кIули гъябгъиди кIури, умуд киврача, – гъапну ич сюгьбатнаъ 17 йисаъ айи, Мягьячгъала шагьрин 56-пи нумрайин мектеб ккудубкIурайи Аминайи. – Эгер вечер гъабхуз ихтияр тутрувиш, жигьиларин кIваз аьзаб хьибди. Му тIягъюн хьадан вахт улубкьайиз терг шул кIури, учу февралин вазлиъ пулра уч дапIну, ресторандихъди йикьрарра йитIнайич. Гьаддиз вечер гъабхуз ихтияр тувур кIури, умуд кайич.
– Йиз бали гьаму йисан 11-пи класс ккудубкIура, – ктибтура Мягьячгъалайин агьали ПатIиматди. – Дугъу чав ктагъу предметариан ЕГЭ тувну ккудубкIну. Натижйириз – балларин кьадарназ – ккилигурача. Бали учв урхуз гъягъру вузра кадабгъна. Мектеб ккудубкIурайи вари жигьилариз уьмрин аку рякъ ккун апIураза, дурарин кIваъ айи хиялар кIулиз удучIври. Улихьна йисари мектеб ккудубкIурайидарин вечерар, гвачIниндиз ресторандиъ шадлугънан серенжемр гъахури, адауйи. Гьамус, коронавирус айивализ лигну, ресторанарра кьаназ лихурадар, инсанарин кьадарра улупна. Саки вари баяр-шубарихъди вечериз абйир-бабарра гъягъюри шулу. Хъа инсанарин кьадар тяйин дапIнайивализ лигну, гьаму йисан абйир-бабар вечериъ гъидритузра мумкин ву. Гьеле фици шулуш, вахт ккимиди пуз читинди ву.
