Республикайиъ коронавирусдиан аьзарлу духьнайи инсанарин кьадар артухъ шулайивалихъди аьлакьалу вуди, вахтназ вуди Дагъустан Республикайин Главайин вазифйир тамам апIурайи Сергей Меликов дагъустанлуйирихьна илтIикIну.
«Гьюрматлу дагъустанлуйир! Аьзиз ватанагьлийир!
Аьхиримжи йигъари республикайиъ коронавирусдиан аьзарлу шулайидарин ва больницйириъ ккаърайидарин кьадар артухъ шулайивали ухьук къурху кипра. Больницйириъ думу жюрейин аьзарлуйириз вуйи йишвар хъана артухъ апIуз мажбур духьнахьа. Гьяйифки, гъийихдарра а. Гъийин аьгьвалатну гъубшу йисан дагъустанлуйирин хизанариз хабарсузди бала гъафи йигъар кIваин апIура. Гьархуз вахт дубхьнадар, ухьуз багьалу фукьан инсанар уьмриан гъушну. Ихь багахьлуйир лайикь вуйиси аьхиримжи рякъюъ тIауз дарши йигъар кIваин апIинай… Мегер ихь уьмриз манзилнаъди ляхин апIувал, дарсар урхувал, хулариан удучIвуз ихтият тут-руврувал хъана гъибдийкIан?!
Мегер ухьуз, раккин хъябкьну хулаъ дусну, ляхин хътарди гъузуз, ихь бицIидариз хьад ва чвул унчIвариантIан дярябкъди ккундийкIан? Республикайиъ мяишатарин ва экономикайин уьмур, театрар ва спортдин залар хъяркьну шлиз ккунду? Диндихъди аьлакьалу аьдатар, шаду сумчрар, дустарихъди сейир апIувалар къадагъа апIувализ фуж ккилигура?
Дагъустан – тягъюн абхънайи вахтна варитIан гизаф зарар гъабхьи Урусатдин регионарикан саб ву. Ухь’ин гизаф читинвалар улуркьну, гъагъи тажрубайикан дарс гъадабгъуншул кIури, умудлу вуза.
Ихь уьмриан гъушу инсанарин, гележегдиъ яшамиш духьну ккунидарин гьюрмат уьбхюри, закурин йигъкан фикир апIури, ухь’ан удукьруб вари тамам апIувал ккун апIури, дих апIураза. Гъаних вирус тарабгъували ухьуз гучI туври ашра, дид’ин гъалиб хьуз кюмек тувру яракь а – вакцинайин руб йивувал. Сасдар касар руб йивуз аькси вуйивал, тмундариз гучI кайивал рябкъюразуз. Инсанарин вакцинайиин хъугъ’вал алдрувал жюрбежюр йишвариан гъюрайи дюз дару мялуматарихъди аьлакьалу ву.
Ватанагьлийирикан ккун апIураза, пишекарвалин аьгъювалар адру инсанарихьди учву алдатмиш апIуз мигъитанай, ичв сагъламвал ва ичв уьмур уьрхяй!
Урусатдин жара регионариъси, ихь республикайиъра вари халкьариз вакцинайин рубар йивбан уьлчмйир кьабул дапIна. Урусатдин пишекрари теклиф апIурайи вари дармнари чпин мянфяаьтлувал улупну, дурарикан ккунибсиб ктабгъуз мумкинвал а. Ихь уьлкейиъ адабгъу дарман гизаф жара уьлкйириъра кьабул гъапIну.
Гьелбетда, вакцинайин руб инсанди чан хушниинди йивну ккунду, хъа ухьу ихь, кIул’инди вари Урусатдин ватандашарин хатIасузваликан улхурахьа. Вакцинайин руб йивували ухьу гьар йигъандин планар тамам апIбахъна, багахьлу ва багьалу инсанарихъди гюрюшмиш хьувалихъна, аьдати уьмрин рякъюхъна хура. Думу кьиматлу ляхнари ухьу вари сатIи апIура, ихь арайиъ жвуван багахьлуйириз, дустариз, гъарашугъариз, жвуван ватандиз харжиб ккуни кас адрувалиин узу умудлу вуза.
Гьюрматлу дустар! Ичв терефнаан гъавриъ хьувализ ккилигураза, вижнасузвалиин, къурхулувалиин, хъугъ’вал алдрувалиин дугъри фикир гъалиб шул кIури, умуд кивраза», – дупна думу илтIикIбаъ.
