РД-йин сагъламвал уьбхбан министерствойин улупбариинди, республикайиъ коронавирусдин тIягъвнихъди аьлакьалу аьгьвалат гъагъи гьялнаъ гъубзра.
Улихьна йисан тарабгъу коронавирусдин уьзриан аьзарлу хьпан дюшюшар республикайиъ йигълан-йигъаз хъана артухъ хьуз хъюгъна. Мидланра гъайри, ихь республикайиъ вирусдин цIийи штамм ачмиш дубхьна. Думура коронавирусарин дестейиан ву. РД-йин сагъламвал уьбхбан министр Татьяна Беляевайин гафариинди, аьхиримжи вахтна республикайиъ индияйин штаммдин вирус тарабгъбан дюшюшар гьисабназ гъадагъна. Му вирус инсандиз аьхю хатIа айиб ва яркьуди тарабгъруб ву.
«Накь, 23-пи июндиъ, саб суткайин арайиъ учу больницйириъ 250 кас ккаунча. Улихьна йигъан ккаъдарин кьадар 276 кас вуйи. Му улупбар аьхюдар ву. Жюрбежюр больницйириъ аьлава дахъру йишвар ачмиш апIбан серенжемар гъахура. Мягьячгъала шагьриъ ерлешмиш духьнайи клиникайин больница ва республикайин инфекцйирин центр, Мягьячгъала шагьринси, республикайин жара шагьрариан ва районариан духнайи, гъагъи гьялнаъ айи аьзарлуйири ацIна. Узу гьамусяаьт коронавирусдикан ваъ, цIийиди тарабгъурайи индияйин штаммдин вирусдикан улхураза. Кечмиш гъахьидарра а. Мисалназ, накь саб суткайин арайиъ му цIийи вирусдиан 4 кас гъийихну», — къайд апIура Татьяна Беляевайи.
Министерствойин вакилари республикайин ватандашарикан чпин сагъ’валин гъайгъушнаъ хьувал, жвуван ва жвуван веледарин сагъ’валихъан жавабдарвал гъабхувал ккун апIура. ОРВИ-йин ва жара уьзрариан аьзарлу гъахьидарихьан больницйириз илтIитIикIди, пишекрариз хулаз дих апIуз шулу. Мидланра гъайри, духтрари гьелелиг жюрбежюр себебариан коронавирусдиз аькси вакцинайин руб диривдариз багахь йигъари прививка апIуз теклиф дивра. Прививка гьамусяаьт республикайиз дубхна ва пулсузди апIура.
Коронавирусдин улупбар
Июлин 24-пи йигъан саб суткайин арайиъ Урусатдиъ коронавирусдиан аьзарлу гъахьидарин 20 182 дюшюш ашкар гъапIну. Ихь уьлкейиъ аьзарлу гъахьидарин уьмуми кьадар 5 388 695 кас ву. Гъубшу суткайин арайиъ 568 кас кечмиш гъахьну. Улихьна йигъан 548 кас гъийихнийи. Вирус ачмиш гъабхьихъан мина Урусатдиъ вари 131 463 кас кечмиш гъахьну. Сагъ гъахьидарин кьадар 4 915 615 кас ву.
Дагъустандикан улхуруш, РФ-дин Роспотребнадзорин РД-йиъ айи управлениейин улупбариинди, гъийин йигъаз республикайиъ коронавирусдиан аьзарлу гъахьи 35 агъзуртIан артугъ инсанар гьисабназ гъадагъна. 1500-тIан артухъ инсан кечмиш гъахьну.
Гъийин йигъан коронавирусдиан варитIан мянфяаьтлу профилактика вакцинация ву. Ичв сагъ’валикан, гележегдикан фикир апIуруш, прививка апIуз гьялак йихьай.
