Хьадан вахт улубкьура, республикайиъ коронавирусдин уьзур кьяляхъ гъябгъюра кIури, инсанарин кIваз рягьят дубхьнайи. Амма сикин хьуз ляхин адар, вари дюн’яйиъ коронавирус тарабгъбан хатIалувал хъана артухъ дубхьна.
Уьзур кубчIвдарин ва дид’ан гъийихдарин кьадар йигълан-йигъаз артухъ шула. Гьаци вушра, ихь арайиъ уьзрин хатIалувалихъ хъугъри адрударин кьадар аьхюб ву. Уьзрин лишнар рякъюри ашра, аьзарлу духьнайивал кIул’ина гъадабгъурадар. Духтрарихьна лап гъагъи гьялназ гъафигантIан илтIикIурадар. Хъа йикIуз ухьуз саризра ккундархьуз, гьаддиз, духтрарин кюмек дарди ил хътабгъуз даршлу гьялназ гъафиган, больницайиз гъягъюрахьа. Духтрари ухьу бадали вакцина адабгъна, вакцинайин руб йивувал ккун апIура. Хъа дурари кIурубдихъ хъугъуз саризра ккундар. Гизафдарин фикриинди, думу уьзур – вакцина иша апIуз кIури дапIнайи бизнесдин уйин ву. Хъа дицисдар мялуматарихъ хъпехъури дусайиз, жвуван сагъламвалин гъаравлиъ гъахьиш, ужу ву.
2019-пи йисан аьхирихъан мина коронавирусдин инфекцияйикан гизаф дупна, инсанариз думу тема даккун дубхьна. Вушра, аьзарлу хьайиз, дидкан хъана ктибтувал ич буржарикан гьисаб апIурача.
«Узу гизаф вахтна гьаму тIягъвнихъ хъугъри гъахьундарза. Уьлкейин кIулиъ айидариканра хъял кайиз, фицики узу, саб бицIи кафе арендайиз гъадабгъну, гьадушваъ лихури, йиз хизандиз мадар апIурайза. Коронавирусдихъди аьлакьалу вуди кафейин ляхин кьатI гъабхьну. Гьязур гъапIу ипIруб масу тувуз ихтияр айи, хъа думу жюрейиинди гъазанмиш гъапIуб кафейиъ ляхин апIурайи дишагьлийириз маважиб тувузкьан гьубкIрадайи. Кафе хъябкьнийча. Карантиндин вахтна швнуб-саб ражари аьдати жюрейин гриппдин лишнариан аьзарлу гъахьнийзу, амма духтрихьна дурушди сагъ шулийза.
Узу больницайиъ дахъну, гъи 10-пи йигъ вуйиз. Коронавирус аьдати гриппсиб уьзур дар, гьамус дидин гъавриъ аза. Бедендин температура 38,6-39,3 градус вушра, ил хътабгъуз читинди вушра, духтриз дих дарапIди 5 йигъ гъабхьнийиз. Аьхирки, духтриз дих дапIну, дугъу йиз анализ гъадабгънийи ва компьютерин томография апIуз гьаънийи. Лигуруш, уьзри йиз гъурдларин 45% дибиснайи. Думу аьгьвалат гъябкъю духтри, узу хулаз гъягъюзкьан гъидритди, больницайиз гьаъну. Анализдира коронавирусдин уьзур айивал улупнийи. Духтрари дармнар тувра, рубар йивура. Ил хътабгъуз рягьят гъабхьну, амма бедендин температура 37,8-дилан ис шуладар. ИпIрубдихьна иштагьвал затра адариз, гьаму жюрейиинди иццру гъахьир дарза»,
– ктибтну узуз таниш дишагьлийи телефондиан вуйи ич сюгьбатнаъ.
«Сад йигъан бедендин кефйир адарди нивкI’ан уягъ гъахьнийзу. ГвачIнинган ляхниз душну ккундийи. Жандиъ мяхъ айиз. Термометр ккивну, температура гъеебцнийза. Термометри 39,8 градус улупурайи. Парацетамолин таблетка хъютIюбкъну, цIибсан ахникк дахъну гъузну, хъа гъудужвнийза. Чайракк шекер ккабхьну, ширин чай убхъуз хъюгънийза. Амма мюгьтал гъахьиза, чай меълиди дайи. Коронавирусдин лишнарикан деебхьнашра, хъугъуз ккунди адайзуз. Поликлиникайиз душну, духтри дармнар дикIуз гъитну, анализар тувну, хулаз гъафнийза. Жандин аьгьвалат лап гъагъиб вуйи. КIул, ликар-хилар – вари иццурайиз, улар тIауз затра гьял ктарди 5 йигъ гъабхьнийиз. Хъа анализди гьапIуз-вуш коронавирус кайивал тасдикь гъапIундайи. ЙицIуд йигълан сагъ духьну, ляхниз удучIвнийза. Духтрари коронавирус вуйивал тасдикь гъапIундаршра, узук думу тIягъюн кубчIвувалиин умудлу вуза»,
– ктибтну узуз сарсан ихь жигьил ватанагьлийи.
Гьаму касарра чпик уьзур кубчIвнайивалихъ хъугъри гъахьундар. Хъа иццру гъахьиган гьапIуз-вуш ихь фикрар дигиш шулу, духтрарикан дарман ккун апIурухьа. ЙикIру гьялнаъ айи касдиз кюмек апIуз духтрариз читинди алабхъуру. Гьаци вуйиган, аьзиз ватанагьлийир, ухьу духтрариз кюмек духьну ккунду. Аьзарлу гъахьиган, духтрихьна илтIикIуз кьан мапIанай, ичв сагъламвал къайдайиз хуз вахтниинди кюмек йихьай. Хъа думутIанна ужуб, аьзарлу хьайиз гъудрузди, душну поликлиникайиз вакцинайин руб йивай. Вакцинайин руб гъивдар гизаф а, дурар сагъ-саламатди лицура. Аьхю духтраринтIан инстаграмдиъ айи лутйирин гафар заанди мидисанай.
