Гьар йисан 21-пи июндиъ сагъламвал уьбхру пишекрарин Йигъ къайд апIури шулу. Думу йигъаз тялукь вуди Табасаран райондин кьялан больницайиъ шадлугънан серенжем кIули гъубхнийи. Дидиъ иштирак хьуз больницайин актовый зализ, ЦРБ-йиъ лихурайи вари духтрарилан савайи, райондин гъулариъ айи медицинайин гъуллугъчйирра дуфнайи.
Сагъламвал уьбхру гъуллугъчйир пишекарвалин йигъахъди мубарак апIуз Табасаран райондин глава Мягьямед Къурбановра гъафнийи.
Дугъу чан удучIвну улхбаъ гъапиганси, коронавирусдин тIягъюн дюн’яйиз удубчIвну, магьа кьюд кIуру йис ву. Диди вари дюн’яйиъ яшамиш шулайи инсанарин уьмур дигиш гъапIну, гьаддиз сагъламвал уьбхру пишекрарин зегьметназ гьамусяаьт аьхю фикир тувра. «Ав, инсандин жандин сагъ’вал ва яшайиш медицинайин гъуллугъчйирин зегьметнакан асиллу ву. Райондиъ коронавирус цIибдитIан тарарабгъбан бадали, дурари чпин вари аьгъювалар ишлетмиш гъапIну. Духтрари лазим вуйи къайдайиинди ляхин апIбан бадали, райондин кIулиъ айидарира чпин терефнаан вари апIура. Гьаму аьхиримжи вахтна ЦРБ-йиъ саб хайлин дараматар рас дапIна ва апIури а, кабинетар, лабораторйир диагностика апIбан цIийи алатарихъди ва авадлугъарихъди тямин дапIна. Думу цIийи авадлугъарихъди ляхин апIуз дубгъбан бадали, республикайин пишекрарихъди ляхин гъабхура, гъулариъ цIийи ФАП-ар дивра. Коронавирусдин тIягъвниин гъалиб хьпан бадали, сагъламвал уьбхру пишекрари инсанарихъди ляхин дубхну ккунду, вакцинация апIувал чарасуз лазим ву», – къайд гъапнийи Мягьямед Къурбановди.
Серенжемдиъ гъулху Табасаран райондин ЦРБ-йин кIулин духтир Абсередин Мирзабеговди райондиъ вакцинация гъабхувалин натижйирикан ктибтну. «Гъийин йигъаз райондиъ 3700 касди вакцинайин рубар йивна. Му улупбар республикайиъ айи районарихь тевиш, заан улупбарси гьисаб апIуз шулу. Республикайин кIулиъ айидарира, духтрарира, коронавирусдиз аьксиди гъабхурайи ляхин цIибди зирекди дапIну ккунду кIури, тIалаб апIура. Райондиъ му тIягъюн тарабгъувал дебккбан бадали, 17000 касдиз вакцинайин рубар йивну ккунду. ЦРБ-йиъ вакцинайин рубар йивуз гъулариз гъябгъру бригадайирира ляхин апIура», – гъапну дугъу.
Медицинайин коллектив пишекарвалин йигъахъди мубарак апIури, серенжемдиъ ЦРБ-йин кIулин духтрин кюмекчи, гьятта 50 йисан райондин больницайин кIулин духтирди гъилиху РФ-дин лайикьлу духтир Мирзамягьямед Мягьямедовра удучIвну гъулхну. Дугъу больницайи гъазанмиш дапIнайи хъуркьуваларикан ктибтну. «Гъи райондин больницайиъ ужувлахъинди вуйи дигиш’валар гизаф духьна. Райондин больница Дагъустандин ужударсдар больницйирин жергейиъ ади швнуд-сад йис ву. Больница лазим вуйи кадрйирихъди тямин апIувал дидин материалинна техникайин бина яркьу ва ижми апIувал, сагъламвал уьбхбанна профилактикайин, санитарияйинна гигиенайин, райондиъ коронавирусдин тIягъвниз аькси ляхин кIули гъабхувал заан дережайиъ а.
Сагъламвал уьбхювал мюгькам апIбан бадали, вари жюрейин шартIар яратмиш апIбак пай киврайидар сабпи нубатнаъди райондин кIулиъ айидар, РД-йин сагъламвал уьбхбан министерство ва райондин медицинайин гъуллугъчйирин коллектив ву.
Больницайин ляхниъ ужувлахъинди вуйи хайлин дигиш’валар духьнашра, гьелелиг нукьсанваларра адарди дар. Думу нукьсанваларра арайиан адагъуз чалишмиш хьидихьа», – гъапнийи дугъу.
Серенжемдин аьхириъ Мягьямед Къурбановди, халкьдин сагъ’вал бадали ва коронавирусдин тIягъвнихъди женг гъабхури, ужуб зегьмет гъизигу касар гьюрматнан грамотйир ва жара пешкешар тувбиинди лишанлу гъапIнийи.Дурарин арайиъ духтир-отоларинголог Аьлимягьямед Нуров, ЦБС-дин бицIидар хру отделениейин терапевт Гьябиб Гьябибов, СиртIич гъулан участокдин больницайин педиатр Тимур Мурадханов, бактериологияйин лаборант Суна Бабаева, СМП-йин фельдшер Вадим Гьямзаев, райондин поликлиникайин медсестра Улдуз Шихова, котельнаяйин оператор Гьябибуллагь Рягьимов, СМП-йин машин хъапIру Назим Бабаев, ЦБС-дин бицIидар хру отделениейин санитар дишагьли Мадина Клинжева айи.
