Гъябгъюрайи йисан 11-пи июндиъ чапдиан удубчIву «Табасарандин нурар» газатдин 23-пи нумрайиъ политикайин ва экономикайин отделин редактор Гюльнара Мягьямедовайин Бухьнагъ гъулан агьали Исмяил Шиховдин гафарилан гъибикIу «Саб миллион манат тувну» макьала чап дапIнайи.
Дидиъ Табасаран райондин Хючна гъул’ан Халагъна Угъул дерейиан зина цIийи рякъ апIуз пулин дакьатариинди кюмек туву Халагъ гъулан агьали, гьамусяаьт Испанияйиъ яшамиш шулайи дилаварчи Назим Рамазановдикан гаф-чIал гъябгъюрайи.
Гьаму гьяфтайиъ газатдин редакцияйиз Халагъ гъулан имам Марат Рашидов илтIикIнийи ва сабабнан ляхник пай киву, жумарт юкIвар айи имбу агьалйириканра бикIуб ккун гъапIнийи.
Гьюрматлу имамдин гафариинди, къайд дапIнайи рякъ апIуз кюмек гъапIу касарин арайиъ Гъярихъ гъулан агьали, ихь ватанагьлийириз ужуди мялум вуйи дилаварчи Гьяжибег Аьлибегов (100 агъзур манат), дилаварчи Исмяил Гьябибов (50 агъзур манат), Табасаран райондин имам Ансар Рамазанов (50 агъзур манат) ва ЧвулатI гъулан агьали Михаил Гьяшимов (50 агъзур манат) а.
Марат Рашидовди чвйир Аьбдунасир ва Аьбдугъани Халиловарин гьунарлу ляхин жаради къайд гъапIнийи. Дурари, чпин рягьматдиз гъушу адаш Халилин васият тамам апIури, 44 йигъандин арайиъ, гьар йигъан 10 сяаьтна лихури, намуслу зегьмет гъизигну.
«Дупну ккундуки, сифте вуди гьаму рякъ апIуз хъюгъюр гьадму Халил Халилов вуйи, амма дугъхьан жюрбежюр себебариан думу ният кIулиз адабгъуз гъабхьундайи…
Угъул дерейиан зина вуйи рякъ тикмиш апIуз хъюгъювал машгьур устаз Наврузбег-эфенди бабкан духьну 140 йис хьпахъди аьлакьалу дапIнайиб ву. Гьаму аьгьвалатнура ккергънайи ляхнар ерийиинди кIули гъахуз ва вахтниинди ккудукIуз кюмек апIур кIури, умуд кивраза», — аьлава гъапIнийи Халагъ гъулан имамди.
Гьядисариъ дупнайиганси, инсан дюн’яйилан гъушхъантинара дугъаз сабаб хру ляхарикан саб – садакьа-жария, ясана имбу инсанариз хайир хру, файда кайи ляхин гьисаб апIура. Садакьа-жарияйик тикмиш гъапIу мист, гъапIу рякъ, илипу гъяд, адабтIу штун гъуйи гьисаб шулу.
Рякъ тикмиш апIуз харж гъапIу гьарсаб манат, зегьмет зигури, жандикан ктипу амкIун гьарсаб литIан Первердигари кьабул апIрийичв, гьюрматлу ватанагьлийир.
