Табасаран райондин Дарвгъарин 1-пи нумрайин мектебдин тарихнан ва обществознаниейин мялим Нурлан Исмяилов (шиклиъ) 2021-пи йисан педагогвалин ляхниъ заан хъуркьувалар гъазанмиш апIбаъ Дагъустан Республикайин образованиейин тешкилатарин мялимариз премйир тувбан республикайин конкурсдиъ гъалиб гъахьну.

 

 

Конкурс Дагъустандин илмин ва образованиейин министерствойи тешкил гъапIнийи. Думу мялимарик педагогвалин ва тербия тувбан рюгь капIбан ва дурарин яратмиш’валинна пишекарвалин удукьувалар хъана артмиш апIбан метлеб ади гъабхурайиб ву. Конкурсдиъ республикайиан 31 мялим гъалиб гъахьну. Гьадрарин арайиъ ихь ватанагьли Исмяилов Нурлан Дашдемировичра а. Гъалибчйириз 200 агъзур манат премйир тувну.

Нурлан Исмяилов райондин мялимарин жямяаьтлугъдин арайиъ гьамусдин деврин тIалабариз жаваб туврайи, образованиейин улихь гъягъюрайи технологйир ишлетмиш апIури, ляхниъ заан натиж-йир улупури, урхурайидариз ерийин аьгъювалар туврайи пишекар мялимси таниш ву.

Дугъу Дарвгъарин 1-пи нумрайин мектебдиъ ляхин апIури 18 йис ву. Гьаму вахтнан арайиъ Нурлан Исмяилов ва дугъан ученикар халкьдин тарих, аьдатар, культура ва дуланажагъ аьгъю апIбаз диш дапIнайи муниципалин ва региондин дережайин конкурсариъ гизаф ражари гъалиб гъахьну.

Чан ляхниъ мялимди баяр-шубарин удукьувалар ашкар ва артмиш апIбаз заан фикир тувра.