Улихьна йигъари Табасаран райондин дишагьлийирин Союздин председатель, райондин Жямяаьтлугъ палатайин вакил ва Кюргъярин кьялан мектебдин директорин тербия гъабхбан ляхнарин заместитель Айханум Рашидова «Табасарандин нурар» газатдин редакцияйиз хялиш гъахьну. Дугъахъди, чав кIули гъахурайи вазифйирикан маракьлу сюгьбат кIули гъубхунча.
Сифте кIулиан Айханум Рашидовайи дишагьлийирин Союзди Табасаран райондиъ апIурайи ляхникан ктибтнийи.
Му тешкилат 2017-пи йисан эвелиан ачмиш гъапIуб ву. Айханум Рашидовайин гафариинди, думуган райондин главади лихурайи Алавудин Мирзабалаевди республикайин дишагьлийирин Союздин кIулиъ айи Интизар Мамутаевайихъди вуйи гюрюшнаъ, райондиъ дишагьлийирин тешкилат ачмиш апIуз айи мумкинваларикан ва му ляхин ужуб ерийинди кIули гъабхуз удукьру дишагьли агуз шлувликан мялуматар тувну. Ва цIиб вахтналан райондиъ дишагьлийирин союздин тешкилат абццнийи. Гьадму йисан мартдин вазлиъ райондин администрацияйин ва республикайин дишагьлийирин Союздин тешкиллувалиинди Табасаран райондиъ сабпи ражари дишагьлийирин форумра гъабхьнийи.
«Ич тешкилат – жямяаьтлугъ тешкилат ву. Тешкилатдин асас вазифа – яшайишдин месэлйирин гьякьнаан дишагьлийириз кюмек апIуб ву. Мисал вуди гъадабгъиш, аьхиримжи вахтари бицIидар айи ялгъуз дишагьлийириз жюрбежюр идарйириз хъадаъну ккуни документар гьязур апIурача вая телефондиан дурариз лазим вуйи насигьятар ва мялуматарин кюмек туврача.
Райондин гизаф гъуллугъар гьуркIру жигьиларин Центрихъди сатIиди учу рягьимлувалин акцйириъра иштирак шулача. Гьаци, сач коронавирусдин тIягъюн айи вахтна жигьиларин Центрихъди ва Табасаран райондиъ айи рягьимлувалин «Умуд» фонднахъди сатIиди хайлин хизанариз кюмек гъапIунча.
Жигьиларин центрихъди ужудар аьлакьйир айич: дурари гъахурайи серенжемариъра гьаммишан иштирак шулача, центрин вакиларихъди сатIиди райондин гъуларин мектебариз гъягъюри, урхурайи баяр-шубарихъди жюрбежюр темйириан насигьятвалин сюгьбатар гъахури шулча», – ктибтнийи Айханум Рашидовайи.
Сюгьбат давам апIури, Табасаран райондин дишагьлийирин Союздин председатели чпин тешкилатдиз дахил шулайи, ясана чпихьна илтIикIурайи дишагьлийириканра уьмуми мялуматар тувнийи.
«Сифте, тешкилат абццну имиди, учухьна илтIикIрудар цIибтIан дайи, хъа гьамус, кюмек ккун апIури илтIикIурайи дишагьлийирин кьадар йигълан-йигъаз артухъ шула.
Асас вуди яшайиш жигьатнаан читин гьялнаъ айи, игьтияж айи хизанариз вуйич туврайи кюмек. Гъийин йигъан райондин дишагьлийирин варитIан читин месэлйирси газран, акварин мяишатарихъди аьлакьалу вуйидар гьисаб апIуз шулу, гизафдар аьзарлу касариз жара йишвариз гъахуз ихь райондин больницайиан направление гъадабгъбан месэлйирин гьякьнаан илтIикIуру. Ич терефнаан дурариз учхьан шлу вари кюмек апIурача», – къайд гъапIнийи Айханум Рашидовайи.
«Сабсана дюшюшнакан дарпиди гъибтуз шулдарзухьан. ЦIиб улихьнаси ихь райондиан армияйиз гъуллугъ апIуз гъушу сар жигьил, жара эскрарихъди кчIихбариъ иштирак духьну, учв тахсиркар даршра, дустагъдиъ итнийи. Сад йисандин арайиъ учу райондин дишагьлийирин Союздин терефнаан зат яваш дарди дустагъдин аьхюрин ччвурнахъ, гьякьсузди жаза тувнайи бай азад апIуб ккун апIурайи кагъзар хътаури гъахьунча. Натижайиъ ихь ватанагьли дустагъдиан азад гъапIнийи. Йиз фикирнаан, думу ич тешкилатдин аьхю гъалибвал ву. Гьяйифки, балин дада дишлади учухьна гъафундайи, дарш бай думукьан вахтна дустагъдиъ хьидайи. Чан аьгъдрувалиан думу дишагьли гьацI йислантIан учухьна илтIикIундайи», – аьлава гъапIнийи Айханум Рашидовайи.
Айханум Рашидовайи райондин Жямяаьтлугъ палатайиъ чав гъабхурайи ляхниканра жикъиди ктибтнийи.
Думу райондин Жямяаьтлугъ палатайиъра ватандаш’валин месэлйириз лигру комитетдин председатель ву.
«Асас вуди райондин главайихъди вуйи совещанйириъ дугъу ич улихь диву месэлйир гьял апIбан бадали, учу, гъулариз гъягъюри, агьалйирихъди ляхин гъабхурача. Гьамусяаьт интернетдин жюрбежюр сетариан инсанарин арайиъ дюз дару мялуматар гизаф тарагъура. Гьаддиз учу, дюзи мялуматар туври, агьалйир гъаврикк ккаъбан ляхинра гъабхури шулча.
Мидланра гъайри, рякъярин гьякьнаанра учухьна хайлиндар илтIикIури шулу. Амма му месэлайиан йигъан аьрзйир гъидикIну кIури, рякъ саб дупну апIуз шлуб дар. Гьарсаб ляхнин чан план, проект айиб ву. Гьаддин гьякьнаанра учу гъуларин яшлу касар гъаврикк ккаъбан серенжемар гъахурача», – гъапну Айханум Рашидовайи.
