Дагъустандиъ уьлин кьимат 5-7 манатдиинди багьа хьибди. Гъюру гьяфтайихъан хъюгъну, буханкайин кьимат 23 манатдилан 27-29 манатдиинна за хьибди – мялумат тувну Дагъустандин гъулан мяишатдин ва ипIру-ухру сурсатарин министерствойи.

 

Дагъустандин гъулан мяишатдин ва ипIру-ухру сурсатарин министрин заместитель Эмин Шайхгьясановдин гафариинди, республикайиз вари хю гъирагъдилан хурайиб ву. Гьаддиз уьлин кьимат за хьувалин себеб бензиндин, газдин кьиматар за хьпахъди аьлакьалу хьуб мумкин ву.

«Йиз фикриан, эгер убгрубдин кьимат за шули гъабхьиш, вари мутмйирин кьиматар за хьиди, гьаз гъапиш вари мутмйир-шей’арин аьхиримжи кьиматар асас вуди гьаддилан асиллу шула. Гъи Москвайиан фукIа хуз багьади удубчIвура. Гьелбетда, гьясил апIурайидари чпиз хайирсузди ляхин апIидар, натижайиъ кьиматарин гъагъ аьдати агьалйирин гъюнариин алабхъура», – гъапну министерствойин вакили.

Уьл убжру заводарин вакилари уьл багьа хьпаз логистикайин кьимат за хьували ва тахил цIибди ккадабцIувалира тясир гъапIну, кIура.
Му аьгьвалат гьял апIбан бадали РД-йин минсельходин уьл гьясил апIру заводарин вакиларихъди гюрюшар гъахиди.