13-пи октябриъ Дагъустандиз Федерацияйин Советдин делегацияйин дахилнаъди сенаторар Виктор Бондарев, Александр Варфоломеев, Андрей Шевченко, Владимир Городецкий, Дмитрий Кузьмин, гьацира Федерацияйин Советдин комитетдин аппаратдин кIулиъ айирин заместитель Алексей Головин ва дугъан теклифчи Евгений Кискин гъафнийи. Гьадму йигъан хябяхъган республикайиз Федерацияйин Советдин председателин сарпи заместитель Андрей Яцкинра хъуркьнийи. Дагъустандиъ дурарихъди Ильяс Умахановра сатIи гъахьнийи.
Делегация, региондин читин месэлйириз кюмек тувбан суалар гьял апIбан бадали, рес-публикайин яшайишдин мяна айи объектариина гъушну.
Федерацияйин Советдин вакилар Къизилюртдиъ тикмиш апIурайи бицIидар бабкан хруган кюмек тувру больницайиз, туристарин арайиъ машгьур вуйи «Главрыба» ва Сулакдин дерейиз гъушнийи.
Гьацира дуфнайи хялар Семендер поселокдиъ кьюб бассейн ади тикмиш апIурайи мектебдизра гъилигну. Йигъан аьхириъ сенаторар Мягьячгъала шагьрин Редукторный поселокдин райондиъ Каспий гьюлиз марцц дарапIу чиркин шид гъябгъюрайи йишв’ина гъушнийи.
Республикайиз дуфнайи Федерацияйин Советдин вакиларин кьюбпи йигъ Каспийин флотилияйин объектарилан илтIикIбалан ккебгънийи. Дагъустандин меркездин мэр Салман Дадаевдин гафариинди, Урусатдин военный гъуллугънаъ айидариз хулар оборонайин министерствойи тикмиш апIура. Яшамиш шлу хуларин инфраструктура гьюкуматдин программайин дахилнаъди муниципалитетди тямин апIиди. Хуларихьан ярхла дарди бассейнар ва деврин жара мумкинвалар айи, 1224 бицIириз йишв айи бицIидарин багъ ва мектеб ерлешмиш хьиди.
Делегацияйин кIулиъ айи Андрей Яцкинди гъапиганси, гьаму йисан Москвайиъ Дагъустандин Йигъар гъахру вахтна республикайин кIулиъ айи Сергей Меликовди гъитIиркку месэлйир гьял апIбан план тартиб апIувал улихь дийибгъна. «Дорожная карта» арайиз дубхна. Яшайишдин мяна айи, чиркин шид марцц апIбан дараматар, сагъламвал уьбхбан объектар, Каспийин флотилияйихъди аьлакьалу дараматар рас ва тикмиш апIувал – магьа улихь дийигънайи месэлйир.
Думу месэлйирин гъварч Федерацияйин Советдин делегацияйин вакилари вахт ккимиди гьял дапIна. Гьаддиинди ляхин ккудубкIурадар: гьюкмин ляхин кIулиз адабгъру федеральный органар ляхнихьна жалб апIувал планламиш дапIна. Андрей Яцкинди рес-публикайин агьалйириканра арайиъ айи месэлйир гьял апIбан ляхниъ иштирак хьувал ккун гъапIну.
